BlognyGaelgey

Çhellveeishseyr

2011-11-02T12:15:00.006Z

Hug mee ammyr çhellveeish er bun, mysh blein er dy henney. T'eh ry-gheddyn er YouTube my ta shiu geiyrt er y chiangle shoh.

Chammah's shen ta ammyr elley enmyssit 'Gaelg', ta ry-gheddyn ec y chiangle shoh:

As my t'ou geearree geaishtagh rish claare radio Gaelgagh ta nish daa chlaare ry-gheddyn er yn eddyr-voggyl ec Radio Vannin, ec y chiangle shoh: 'Traa dy Liooar' (dagh Jelune), as 'Jamys Jeheiney' (dagh Jeheiney). Chammah's shen, ta Gaelg goll er loayrt sy chlaare 'Moghrey Jedoonee' (dagh Jedoonee), as ny keayrtyn ayns 'Shiaght Laa' (dagh Jecrean).

Turrys yn Aeglagh / Turrys ny h-Idaal

2011-05-03T09:21:00.002Z

Va ratçhyn-keimagh (stage races) mooarey ayns Mannin ec y chione shaghtyn shoh chaie. She 'Isle of Man Youth Tour' v'ayn. Va ram sleih aegey ass Mannin, Sostyn, Nalbin, Nerin, Bretin as yn Ollynn ayn dy ghoiall ayrn. Va'n emshir feer vie as va'n ratçhal mie er bashtal. Va my vac hene goaill ayrn as sheign dou gra dy row ny ratçhyn feer chroie. Er y fa nagh vel ny ratçhyn agh son sleih aegey, cha nel yn turrys shoh ardghooagh çheumooie jeh seihll roaraght ny h-ellanyn shoh. Agh keayrt dy row va ooilley ny rollageyn roaraght smoo çheet dys Mannin son Çhiaghtin Raoaraght Eddyr-Ashoonagh, goaill stiagh Faustino Coppi as Laurent Fignon, as ta'n Youth Tour hene er chooney lesh ratçheyderyn Manninagh, myr sampleyr, Jonny Bellis, Mark Cavendish, Mark Christian, Peter as Tim Kennaugh gaarlaghey son ratçhal ayns ratçhyn smoo ny theihll.

Dy jarroo, bee fer jeh ny ratçhyn-keimagh smoo sy theill goaill toshiaght er y gherrid - shen Il Giro d'Italia (Turrys ny h-Idaal), as bee daa ratçheyder Manninagh goaill ayrn - Mark Cavendish son Team HTC-HighRoad as Peter Kennaugh son Team Sky. Ta Cav ardghooagh myr sprinteyr, agh ta Peter goll ny share ayns ny sleityn. Aigh vie da'n jees oc.

Baase Yn Lhiass-Varran Iain Noble.

2011-01-11T16:48:00.005Z

S'treih lhiam gra dy dooar Sir Iain Noble baase Laa ny Nollick. Hooar eh baase sy thie echey hene er yn Ellan Skianagh.

Va Iain Noble ny vanceyr tra v'eh ny saa, agh reck eh yn banc echey bleeantyn er dy henney, as chionnee eh ram thalloo ayns Sleat, er yn Ellan Skianagh. Agh, cha row eh, gollrish ram sleih berçhagh as thalloo oc ayns Nalbin, ny woid gortagh eddyr.

Va Iain lane son y Ghaelg, as hug eh Sabhal Mòr Ostaig, ayns Sleat, er bun sy vlein nuy keead tree jeig as tree feed. She colleish Ghaelgagh yn boayl shoh, raad oddys sleih jannoo ram coorseyn trooid Gaelg ny hAlbey. Ta ram Gaelgeyryn er ngoll dys shen er turrys, as ta mee hene er ve aynshen ram keayrtyn. Bwooise da'n cholleish shoh, foddee, ta bunscoill Ghaelghagh ayns Sleat, as Gaelg ry-chlashtyn ayns ram buill syn ard shen.

Chammah's yn cholleish, hug Iain colughtyn thie-aaght as ushtey bea er bun. Ta'n colught ushtey bea jannoo ushtaghyn-bea enmyssit; 'Poit Dhubh' (Pot Dhoo), Tè Bheag nan Eilean (Jeh Veg ny hEllanyn) as MacnaMara (Mac ny Marrey). T'ad ooilley feer vie (agh beggan deyr).

Cha row eh gyn noidyn eddyr. Va polisee son Gaelg ny hAlbey ayns ooilley ny colughtyn echey, hug eh er y lught-obbree ayndaue ee y ynsagh, ren eh Gaelg ny 'requirement' ayns soilshaghyn-obbree son ny colughtyn as dooyrt eh dy foshlit dy row eh lane noi Sostynee as joaree elley goaill ooilley ny hobbraghyn share ayns Eiraght Ashoonagh ny Albey neesht!

Haink mee e whail keayrt ny ghaa sy thie oast echey er yn Ellan Skianagh. Shegin dou gra dy row eh ny ghooinney er lheh, as cha dod mee cordail rish dagh fockle ass, agh gyn ourys, lhisagh shinyn, ta son y Ghaelg, bwooisal y ve er son e vea as ooilley ny reddyn jeant echey er e son.

Skeeal Quaagh

2010-10-26T21:34:00.004Z

Va mee ayns Nerin yn çhiaghtin shoh chaie. Va mee ayns Beeal Feirshtey rish daa laa son cruinnaght yn Coyrle Goaldagh - Yernagh. Shen coyrle eddyr-reiltys, va currit er bun ayns 1998 myr ayrn jeh'n Choardailys Jeheiney Caisht. Er lhiam dy row eh currit er bun dy chooney lesh shee, agh choud's dod mee hene fakin cha row eh agh cooney lesh linnaghyn-aer ynnydoil, thieyn-aaght, thieyn-bee as thieyn oast.

Ansherbee, v'eh orrym loayrt mychione y Ghaelg ayns fo-haglym mychione ny çhengaghyn sloo. Marym va sleih shassoo son; Yernish, Gaelg ny h-Albey, Bretnish, Cornish, Jerseyish, Guernseyish as ... 'Baarle-Albinagh-Ullee'. Shen kiart, 'Baarle-Albinagh-Ullee'!

"C're shen?" smooinee mee, as ren mee my chooid share cour feddyn magh. Agh, begin dou çheet thie lurg daa laa gyn ve agh beggan ny s'creeney. T'eh jeeaghyn dooys dy re yn blass Baarleagh ec Ballymena t'ayn - gollrish y Vaarle va Joey Dunlop loayrt - agh t'eh goll er dellal rish myr dy beagh eh ny hengey er lheh. Shoh eirtys y Chordailys Jeheiney Caisht. Rere ny Yernee as Yernish oc, tra va ny politickeyryn cur yn cordailys shen ry-cheilley va Shin Hene (Sinn Féin) shirrey cordailys dy beagh Yernish ny hengey oikoil ayns Nerin Twoaie ayns ny laghyn ry-heet, as, ec y minnid s'jerree dooyrt ny leighaltee "Cre mysh y çhengey sloo ainyn?" As myr shen, cour shee, haink Baarle-Albinagh-Ullee dy ve ny çhengey er lheh.

Va 'Jantys Baarle-Albinagh-Ullee' (Tha Boord o Ulstèr-Scotch) currit er bun ayns 1998, agh neayr's shen cha nel scoill, ny eer lessoonyn er ve currit er bun. Ta offish oc ayns Beeal Feirshtey, as hie mee dys shen (t'eh feer faggys da'n thie-aaght raad va mee goaill aaght), agh, atreih, v'eh follym. Hirr mee er dooinney ec y çhaglym loayrt beggan dou, agh dooyrt eh nagh row ad hene flaaoil, agh yeeagh eh brochureyn dou. Ayns ny fotografyn va ram sleih ceau kiltyn Albinagh, cloie ny pibbyn moarey as jannoo sorçh dy Highland Fling. Dooyrt mee rish lesh mongey dy vel yn cultoor oc jeeaghyn ny smoo Gaelgagh na'n cultoor ec ny Gealgeyryn hene, agh hoig mee dy jeeragh dy row faux pas mooar jeant aym - "'s no f✳✳kin' Gaelic ... its Scots!" as eh. Myr shen, haink mee thie gyn monney fys er y chooish.

Agh, cha nee shen jerrey my skeeal. Lurg dou çheet thie ren mee beggan dy ronsaghey er-lhinney, as hooar mee magh dy vel ad cur magh earishlioar ta ry-gheddyn er-lhinney. T'ee enmyssit 'Oot an Aboot' (cha nel aundyr ry-gheddyn son cur Baarle er shen!). Ga ta'n chooid smoo j'ee ayns Baarle, çheu-sthie yn fer noa hooar mee daan ny ghaa sy çhengey hene. As, bannee mee, agh foddym toiggal dagh fockle. Dy jarroo, ta mee hene bunnys lane flaaoil.

S'quaagh y cooish shoh nagh vel? Dy jarroo, ta raa mie rish sy çhengey noa aym - its a cracker!

2010-02-14T16:17:00.002Z

Shoh screeuyn honnick mee jiu, as ren scan jeh. T'eh voish JJ Kneen da'n charrey echey Cyril I. Paton va gobbraghey ayns Colleish Streatham. Choud's ta fys aym, t'eh screeu mychione 'Manx Placenames'. Shoh ny focklyn:

22/3/26

y Charrey,

Gura mie mooar eu son y screeuyn foaysagh ny ta shiu er chur hym, ta mee shickyraghey shiu dy lhaihym eh feer chiarailagh. Te cur lane taitnys dou fys y ve aym dy laik shiu yn chied earroo, as ta mee treishteil dy laik lhiu ny earrooyn elley myrgeddin.

Myr ta shiu gra, te er ve obbyr feer chreoi dou, as ver eh booise dou tra ta kione currit er aym.

Cha bee eh foddey roish ta'n nah earroo ayns ny laueyn eu, as ta'n cloudeyr ginsh dou dy bee yn trass earroo currit magh roish hig y Sourey orrin.

Hee shiu ayns ny pabyryn Manninagh dy row cloieaghyn ain ayns y "Gaiety Theatre" dy hroggal argid son yn obbyr, as yiowmayd mysh jeih puint as feed ass shen lurg ta dy-chooilley red elley eeckit er e hon.

Nee yn clane obbyr costal - foddee harrish - queig keead punt, myr shen nee shin fakin nagh vel y goaill-ayns-laue eddrym.

Cur booise riu neesht son y screeuyn kenjal eu

Mish,

Lesh ammys,

JJ Kneen

Foast Bio

2009-11-22T16:12:00.002Z

Hello my chaarjyn, she traa foddey er ve ayn neayr's screeu mee er y vlog shoh. Ta mee er ve tarroogh ass towse, agh nish ta mee smooinaghtyn mychione shallee noa bentyn da'n vlog shoh. Ta mee son screeu skeeal. Bee yn chied ayrn ry gheddyn er y gherrid.

blog noa

2009-06-29T10:10:00.003Z

Traa foddey gyn screeu. Ta mee er ve feer tarroogh, agh cha nee leshtal mie shen. Ta mee jus' er n'akin blog elley sy Ghaelg, as va shen dy my ghreinnaghey post noa y screeu. She blog Claare ny Gael liorish Bob Carswell ta mee çheet er, t'eh kianglit rish yn chlaare radio echey as t'eh ry-gheddyn ec <http://www.manxradio.com/blog.aspx?blogid=14912>.

Loayrt dy firrinagh, cha nel monney niaght aym pene. Ta mee er ve gobbraghey dy jean cur Gaelg er daa ur-skeeal screeuit hoshiaght ayns Gaelg ny h-Albey, as daa 'er elley screeuit ayns Yernish. T'ad jeeaghyn feer vie, agh ta'n obbyr goll dy moal. Ta mee cliaghtey cur shilley er Brian as meeiteil marish Gaelgeyryn elley son coyrle y ' eddyn, agh shegin dou goaill rish nagh beagh ad jeant er y gherrid. Ta feme ain er lioaryn teks y screeu son ny h-ardscoillyn, as ga dy vel yn obbyr shen cur dreeys orrym shegin dou shen y yannoo hoshiaght.

Ta my ven as my 'neen shinney goll dys y Çhapaan ec jerrey yn çhiaghtin shoh as, er y fa dy bee eh orrym freayll rick er ny paitçhyn elley, cha bee caa aym goll magh dys Y Chruinnaght - ta goaill toshiaght y chied laa jeig Jerrey Souree.Ta mee hene as my vac goll dys Y Çhapaan ayns Luanistyn, as ta mee kiarail screeu dy reiltagh mychione y turrys shen er shoh.

Gamman mie

2009-03-04T23:34:00.003Z

She shoh yn laa hooar skimmee bluckan-choshey y Vunscoill Ghaelgagh y chied varriaght oc. Aboo yn Vunscoill! Chossyn Skimmee B y Vunscoill (son y chooid smoo blein 3 as 4, agh lesh cooney voish Magnus as Louis ass blein 2 as Pheonix as blein 5) gamman noi Bunscoill Willaston. Hooar Pheonix Gale y chied dean, as lurg da Willaston chosney daa ghean, vleayst Toshiki Teare y bluckan stiagh sy dean jus' roish lieh-hraa. Ec fea yn lieh-hraa loayr Captan Hewson rish y skimmee (sy Ghaelg). Sy nah lieh hooar Williston caa lurg caa, agh va Greg Halliday freayll dean y Vunscoill dy shickyr. Va'n scoar foast 2-2 as jus' tree minnid faagit. Hooar Adam Long y vluckan as dy cool as dy schlieoil, hug eh shaghey y cheeper eh. Ren Willaston baggyrt er dean y Vunscoill son cooid elley y ghamman, agh va'n linney-cooyl (Ambee, Phin, Magnus as Louis) cho shickyr as creg. Ta mee jeant feer wooiagh.

Oie Heiney syn Ablet

2009-03-03T21:47:00.003Z

Ogh, s'doillee lhiam goll erash dys my obbyr y moghrey lurg yn oie roish - as myr shen v'eh moghrey y Jesarn shoh chaie. Oie Heiney hie mee-hene as Jamys y Phiobeyr-Faitagh dys y Jiass Dowin son jough, kiaull, spoyrt as y Ghaelg y gheddyn. Hooar mish palçhey dy yough, as hing mee bunnys derrey va'n thie-oast follym - ec traa va ny sleaie na va mee jerkal. Cha nel mooar yn cooinaghtyn aym er yn oie, agh s'cooin lhiam dy diu mee jough quaagh ny ghaa nagh row mee rieau goaill bine jeh roish - agh tra t'ou sy Raue ...

S'treisht lhiam dy ren Jamys Aeg ny h-arraneyn couyral dy tappee, as nagh row yn ven aeg aalin va jeeaghyn mysh ro vollit.

Bee oie Ghailckagh goll er cummal yn çhiaghtin shoh sy Lhong ayns Balley Chashtal. S'doghys lhiam dy bee caa aym goll.

2009-02-17T23:18:00.005Z

Vel enney eu er yn ennym Edward Dwelly? My ta shiu er chur eab er Gaelg ny h-Albey 'ynsaghey er lhiams dy vel shiu er n'akin yn fockleyr mirrilagh jeant echey. Va claare er y çhellveeish noght (er BBC Alba - ammyr 168) dinsh skeeal e vea - as t'eh braew feeu jeeaghyn er - my ta sym ayd er Gaelg ny h-Albey, ny fockleyrys. Va Dwelly ruggit ayns Sostyn Jiass as tra v'eh aeg v'eh ny hidoor. V'eh currit dys Nalbin dy chooney lesh yn obbyr v'ec Towshan ny Gunnyn Mooarey (Ordnance Survey) aynshen. Haink sym er ny h-enmyn buill as fockleyn Gaelgagh er - as myr shen ghow toshiaght obbyr e heihll - screeu fockleyr smoo ny Gaelgey v'ayn rieau. Lurg bleintyn as bleintyn, as eh as yn lught-thie echey surranse gyn argid ny enney, hie yn lioar er cur magh - ga nagh row agh gennid dy leih kionnaghey ny lioaryn. Er lhiam nagh vel ooilley ny claareyn jeant ec BBC Alba yindyssagh, dy jarroo, ta ram claareyn nagh vel feeu jeeaghyn er edyr, agh va'n claare shoh feer vie lhiams, as foddee lhiush - she 'Leabhar an Aigh' yn ennym t'er as t'eh ry-gheddyn ec iplayer BBC Alba.

Blein Vie Noa

2009-01-13T22:35:00.004Z

Gow shiu my leshtal nagh vel mee er screeu red erbee er shoh rish meeghyn. Cre'n fa? Wahll, ta mee er ve feer tarroogh - agh ta fys aym dy re leshtal boght shen! Myr shen, ta mee son jannoo my chooid share art ny ghaa y screeu aynshoh dagh mee veih shoh magh. Neayr's yn art jerrinagh ren mee screeu ta ram reddyn er daghyrt:

Yn Chooish.

Ayns Mee Houney hie Yn Chooish er chummal as hie mee-hene dys bunnys dy chooilley chuirrey-kiaullee as seshooon - as va'd ooilley feer vie. Haink shinyn quail lesh sleih aegey ass Nerin neesht - agh, s'treih lhiam gra nagh vel mee er loayrt roo ny cur çhaghteraght roo lurg daue goll dy valley - agh nee'm er y gherrid!

Yn Nollick

Va mee feer, feer tarroogh ec y traa Nollick - va mee gobbraghey ayns Rhumsaa myr buitçhoor. Ta mee er ve cooney sy çhapp dagh Jesarn neayr's y Tourey, tra haink çhingys trome er my naim, agh she Yn Nollick ta'n traa smoo tarroogh ec buitçhooryn, as myr shen, va mee gobbragh sy çhapp bunnys dagh ooilley oor ny laghyn seyrey aym er lhimmey jeh Laa ny Nollick, Laa'l Steoin as Laa ny Bleeaney Noa. Helg mee y drean as chloie mee cammag ayns Balley Keeill Eoin - agh loayrt dy firrinagh, va mee feer skee!

Baase Cholin y Jerry

S'treih lhiam gra dy daink teaym chree er Colin Jerry er y nuyoo oie jeig jeh Mee ny Nollick as eh cloie kiaull sy thie oast, as dy dooar eh baase gerrid ny lurg. Va Colin ruggit ayns Sostyn sy vlein 1936. Va'n ayr echey ayns yn RAF car y nah chaggey mooar, as v'eh coyrt dys Jourby kindagh rish. Va graih ec ayr Cholin er yn ellan as haink eh dys shoh marish e chloan er ny laghyn seyrey oc ymmodee keayrtyn. Haink Colin hene dy ve cho graihagh er yn ellan neesht dy row eh kynjagh gra dy by vie leshyn çheet dys Mannin couyr cummal. Myr shen, lurg cheim eh myr ynseyder ayns Sostyn, haink eh dys Mannin dy 'eddyn obbyr. Hooar eh obbyr ayns Bunscoill Phurt ny h-Inshey sy vlein 1968. Haink eh dy ve ny Ghaelgeyr, as ren eh obbyr niartal son aavioghey kiaull y theay. Dy jarroo, she Colin yn dooinney screeu ny lioaryn Kiaull y Theay 1 as Kiaull y Theay 2 - lioaryn shegin da kiaulleyder erbee jannoo ymmyd jeh my t'eh son kiaull Vannin 'ynsaghey. Haink eh dy ve feer ynsit as schleioil er yn phiob uillin neesht - she tashtey my chooinaght eshyn cloie carryn Manninagh er y phiob. Un oie, mysh daa vlein dy lieh er dy henney, hie mee dys thie Cholin as Cristl ayns Purt ny h-Inshey er yn oyr dy row eie aym yn phiob 'ynsaghey. Va Colin jeant booiagh, er lhiams, as hug eh piobyn dou er eeasaght - as, roish my dimmee mee, dynsee eh dou yn aght bunnydagh ad y chloie. S'treih lhiam gra nagh dod mee geddyn agh screeagh agglagh assdaue - as cha ren mee cliaghtey monney derrey hug mee seose er baare y phrest ad as daag mee ad ayns shen. Ansherbee, mysh shey mee lurg dou feddyn ad er eeasaght, haink mee e whail, jus' roish y Nollick, sy Thie Bane. Va mee marish Phil Kelly as va shinyn er ve giu gollrish y jouyl son daa ny tree oor. Hoie Colin sheese marin as loayr eh sy Ghaelg. S'beg dod mee credjal cho mie as v'an Ghaelg echey as ny skeealyn va teaumey magh ass. Va Colin ny ghooinney er lheh. Shee Yee er as dy row jough laynt da eu.

Nalbin Noa

2008-10-05T23:26:00.008Z

My leshtal nagh vel mee er screeu mychione y chooish shoh roish nish, agh by vie lhiam ginsh diu mychione turrys ren mee dys Nalbin Noa sy Chanadey ayns Luanistyn, mleeaney. She turrys liauyr v'ayn, voish Mannin gys Lunnin, voish Lunnin gys York Noa, voish York Noa gys Halifax, as fy yerrey, Halifax gys Antigonish. Ayns shen, ayns Olloo Scoill Xavier, va cho-choyrle goll er chummal ec Rannsachadh na Gàidhlig ('Ronsaghey ny Gaelgey' - possan ollooagh son Ghaelg ny h-Albey). Deisht mee rish ymmodee oraidyn as leaghtyn trooid as mychione Gaelg ny h-Albey, as haink mee quail lesh ram sleih as Gaelg ny h-Albey ny Gaelg ny h-Erin oc. Chammah's shen, hie mee dys Eilean Cheap Breatuinn (Ellen Chape Bretin) raad ta'n chooid smoo dy loayrtee dooghyssagh cummal. S'dooie dou va dy chooilley pheiagh v'ayn, as va sym mooar oc bentyn rish y Ghaelg. Va yindys mooar orrym pene dy row Gaelg cho niartal ayns Nalbin Noa as t'ee - eer ayns Halifax, yn ard-valley smoo. Heese ta kuse dy kianglyn diu ta cur sollys tooilley er y chooish.

http://www.halifaxgaelic.ca/tutorials.php
http://www.gaelic.ca/index.php
http://journalism.ukings.ca/files/rr_040208gaelic-jerrett.mp3

Sheanse

2008-09-15T21:18:00.005Z

Gow my leshtal nagh vel mee er screeu monney er y vlog shoh rish tammylt. Ta mee er ve goaill boggey ass ny laghyn seyrey aym - ga nagh row yn emshir ro vie. Nish ta mee er ash ec my obbyr, as mie lhiam ny brastylyn noa aym.

She 'sheanse' y chooish t'ec y vlog shoh jiu - y prowaltys 'CERN" dy ve cruinn jeeragh. Vel fys eu er y phrowaltys shoh - t'eh goll er jannoo ec sheanseyryn syn Elveeish, as adsyn prowal dy yannoo 'towl doo' - ansherbee, hooar mee yn kiangle shoh rish yn ynnyd oc, raad t'ad er chur seose webcam da slieh y theihill. Shoh yn kiangle : http://www.cyriak.co.uk/lhc/lhc-webcams.html

Mark Cavendish - Dooinney Smoo Tappee sy Teihll.

2008-07-17T20:16:00.004Z

Geoffrey Gurrumul Yunupingu

2008-07-16T23:26:00.005Z

By vie lhiam cur enney er Geoffrey Gurrumul Yunupingu eu. She 'earroo nane' ayns ny 'çhartyn' ayns yn Austrail ec y traa t'ayn. She Austrailagh dooie ta'n dooinney shoh as she feniagh ny mynçhengaghyn t'ayn myrgeddin. Ta Mandawuy ny 'er-ynsee syn Austrail as t'eh goaill arrane ayns çhengey e vayrey - Yolngu. Ta'n kiaull ec y dooinney shoh er jeet dy ve feer speedeilagh syn Austrail, as shoh yn chied cheayrt, choud's ta fys aym, ta Austrailagh dooghyssagh er chosney ardghoo son y chiaull echey çheu-sthie ny çheu-mooie jeh'n Austrail.

Shoh kiangle rish arrane liorish:

http://www.youtube.com/watch?v=i-i0FQBbO8E

Ta fer mooinjer da enmyssit Mandawuy Yunupingu, as t'eshyn fer-toshee y vooinjer.

Shoh ny reddyn t'eh gra:

"She Mandawuy Yunupingu mish. She dooinney croggeeyl mish. Ta mee screeu arraneyn as ta mee my arraneyder-leeideilagh sy phossan Yothu Yindi myrgeddin. Ta'n keeall ec m'ennym creg, creg ny hassoo noi emshir. She aile cowrey my leih, she aile ta'n spyrryd aynym.

"Ta kynneeaghys ny ghorley ta jannoo er sleih. S'corrym y feeu t'ain. S'cummey lhiam y daah-chrackan ny credjue ec peiagh erbee. My she sheelnaue t'ayn she carrey dou."

"Bee yn Austrail çheet dy ve ny sampleyr mie da'n teihll ... ta mee fakin Austrailee çheet dy cheilley ass dy chooilley heill, er lheh ass'n Austrail ghooghyssagh as yn Austrail neu-ghooghyssagh - son mairagh share. Shegin dooin glassey stiagh y cheilley ny baghtyn ain."

"Shegin dooin kiangley rish y sleih shinney, gynsaghey voish y chreenaght oc. Ta creeaghyn ny mraane Austrailagh dooghyssagh keayney son nyn gultoor."

Abbyrtys

2008-05-26T19:24:00.004Z

Va mee loayrt rish studeyr shiaghtin ny ghaa er ash as dooyrt eh rhym red ennagh goll rish 'hem gys shen ayns blein'. Hoig mee shen son shickyrys - ve'h son gra 'I'll go there in a year's time'. Er lhiam dy re 'hem gys shen ayns kione bleeaney' na share, agh cha nel mee clashtyn y lhied dy mennick - vel smooinaght ec peiagh ennagh elley er y chooish shoh?

Cooish elley; jeeaghyn er ash er y vlein shoh chaie ta mee fakin nagh vel mee er n'yannoo monney er y vlog shoh. Shoh my leshtal - ta mee er ve ro harroogh - agh va mee loayrt rish Bnr Sharpe ec y Veeb as t'ee gra dy vel ad shirrey artyn son yn ynnyd-thie ocsyn - myr shen, ga dy vel mee noi'n Veeb as ny reddyn t'eh shassoo son, ta mee goaill creeaght reesht bentyn rish Y Ghaelg as yn eddyr-voggle as ta mee er chur ghial (dou hene) un art y yannoo da'n vlog shoh, as da'n Veeb dagh kegeeish veih shoh magh.

Bentyn rish Samantha Barks, mannagh vel fys eu hannah, t'ee er chosney stiagh gys y chlaare s'jerree - hed er cummal y Jesarn shoh çheet ec shey er y chlag er BBC1. Loayrt dy firrinagh, dy reiltagh cha mie lhiam ny claareyn çhellveeish gollrish shoh (by lhiam dy re ommidan yn fer laatçhee ta taishbyney yn chlaare) agh lurg jeeaghyn er son kuse dy hiaghtinyn ta mee er jyndaa yn barrel aym as nish ta mee currit da'n ommidjys dy bollagh - Ansherbee, aigh vie da Samantha fastyr Jesarn.

Fy yerrey, shegin dou imraa y yannoo bentyn rish ny ratçhyn TT. Ta fys aym dy vel ad cur yn olk er ymmodee sleih agh s'mie lhiam ny roaryn-bree, as s'mie lhiam ny ratçhyn- agh gollrish yn chooid smoo dy lieh ta arrys mooar orrym dy vel ad cho gueeeagh. S'treisht lhiam dy bee ooilley ayns Mannin sauçhey as goaill soylley jeh'n chegeeish shoh çheet.

Sam Barks ayns 'Yinnins Red Erbee'

2008-04-25T20:41:00.002Z

Dagh yeearree vie voish blognygaelgey da Samantha ta goaill ayrn ayns 'I'd Do Anything' er y VBC. T'ee er ve jannoo feer vie rish nish, as she ish yn arraneyder share son shickyrys. T'an claare er BBC 1 dagh fastyr Jesarn ec 7.30.

Caisht Sonney Diu

2008-03-21T21:25:00.002Z

Ta mee er ve yindysagh tarroogh dy gerrid - shen y lestal aym as cha nel mee er n'yannoo monney lesh y vlog shoh. Ta'n lioar noa aym bunnys jeant, she insh Ghaelgagh jeh lioar screeuit ayns Yernish t'ayn, ta mee jus' goll trooid reesht dy mynchiarailagh ec y traa t'ayn. Hooar mee coip jeh'n ard-fillym 'Seachd' er DVD yn çhiaghtin shoh chaie - as t'eh feer vie. Ta ram stoo aym y yannoo son my obbyr car ny Caisht (chammah as ymmodee kiarteaghyn thie) - as myr shen, cha noddym jannoo monney er shoh - agh by vie lhiam jannoo podcastyn noa traa ennagh, agh she un red gra as red elley jannoo ...

Jeheiney as Jedoonee

2008-02-18T23:51:00.003Z

Hie mee gys Yn Çhenn Lhong oie Jesarn shoh chaie - as tra va mee goll dy valley, ec leih lurg nane, hug ny meoiryn shee stap orrym, as va mee eginit oc prowal-ennal y ghoaill, as shoh jus' lurg dou giu gless dy ushtey vea! Va mee mie dy liooar (va shen y un ghless dy yough lajer diu mee ooilley yn oie). Ansherbee, ta daa haghyrt as b'vie lhiam cur diu er - shen çhaglym YÇG hed er cummal oie Jeheiney ec thie Vrian, as giense hed er cummal ayns Thie ny Gaelgey Jedoonee. Ta'n giense shoh er ve reaghit son bwooise y chur da Juan Y Chrellin son ooilley yn obbyr jeant echey trooid ny bleeantyn. S'treisht lhiam dy vaikym kuse jeu ayn.

Taghyrtyn

2008-02-15T11:55:00.003Z

Bee giense sy Çhenn Lhong (Yn Albert) ayns Purt le Moirrey noght (15/02/08). Bee Skeeal cloie as bee reddyn goaill toshiaght ec mysh nuy er y chlag.

Mairagh (16/02/08), hed moghrey chaffee er cummal sy çhenn Thie Scoill (y thie ta Caarjyn ny Gaelgey jannoo ymmyd jeh) ayns Balley Keeill Eoin.

Ta obbyr mooar fo raad ec y traa t'ayn son 'Caarjyn as Feniee' - son toilley fys faik shoh:
http://uk.friendsandheroes.com/videos_09.htm
Foddee ta fys eu hannah - agh mannagh vel, as t'ou geearree goaill ayrn, cur fys dou ec yn enmys post-L aym as verrym fys da'n skimmee stiuree.

Niaghtyn elley:
Ayns Nerin ta Shiveishagh Hanafin er chaglaa yn aigney eck as myr shen cha negin da paitçhyn ayns ny Gaelcsoillyn jannoo paart dy nyn lessoonyn trooid Baarle.
Ayns Nalbin t'eh coardit ec yn reiltys as y BBC dy chur Ammyr Çhellveeish er bun mleeaney - Ammyr Ghaelgagh. Bee eh ry-geddyn er Sky.

Yn Assag Drogh

2008-02-01T09:26:00.000Z

Va mee loayrt rish Yn Assag Drogh hene sy Chanadey fastyr Jecrean. Va shin jannoo ymmyd jeh Skype. Cha row webcam eggey, agh dod eh fakin mish trooid y webcam ayms (y dooinney boght). Nagh mie shen, loayrt dy nastee rish dooinney er çheu elley yn Atlantagh dy nastee. Bee'm er Skype dagh Jecrean eddyr mysh 10pm as mean oie (Traa Greenwhich Meanagh). Beemayd maynrey my ta Skype ec peiagh erbee elley ta geearree jannoo co-loayrtys marin. S'yinyssagh dy vel cho wheesh dy 'lieh t'ayn gynsaghey yn Ghaelg liorish yn eggey. Cur fys dou my t'ou gynsaghey Gaelg as cha nel oo cummal ayns Mannin - by vie lhiam cooney lhiat my foddym.

Moylley da'n Olloo!

2008-01-16T22:04:00.000Z

Hooar Brian Stowell yn aundyr Reih Bleeaney Vanannan mleeaney. Ga dy row mee ec e hie Jemayrt, hooar mee y naight ayns y phabyr naight. Ta mee bwooiagh ass towse er e hon - s'toilçhinagh yn aundyr shoh, as ta mee shickyr dy vel yn aundyr shoh s'moo scanshoil dasyn ny aundyr erbee elley ry-gheddyn feie'n chruinney. Moylley dhyt ghooinney!

Blein Vie Noa!

2008-01-06T13:04:00.000Z

Wahll, ta'n vlein noa ayn, as s'treisht lhiam dy bee ish ny blein vie. Va 2007 ny blein doillee dou - ren mee rouyr obbyr as haink mee dy ve feer skee. Shen y fa nagh row artyn goll er screeu aym ayns shoh dy reiltagh. Ta ram stoo aym y yannoo sy vlein shoh neesht, t'eh jeeaghyn goll rish slieau dy obbyr tra ta mee jeeaghyn er - agh s'treisht lhiam dy vel eh feeu. Ta shin er n'akin reddyn goll er oaie dy tappee dy gerrid. Neayr's 2000 ta ymmodee lioayryn far-skeealagh er jeet magh - Reks Carlo ayns Mannin, Dunveryssyn y Tooder Folley, Contortyssyn Aalish, Te Scruit, Skeeallyn Lewis Crellin, Jough-laanee Aegid as Skeeallyn Elley- as y jeh noa aym - Jeih Skeealyn Scaanjooin (tooilley er share sy traa ry heet). Yn red share lhiam bentyn rish ny lioryn ec Brian as Graham as Lewis as Chris - shen dy vel ny skeealyn hene cho mie. Chammah's shen ta lioar chur-sheese noa (er lussyn) er ny cur magh ec Chris Sheard as Juan y voddey, as fer elley er ushagyn ta bunnys jeant ec Paayl Rogers. Chammah's shen ta red mooar fo raad ain lesh 'Caarjyn as Fenee' - y cartoon Biblagh ta shin cur Gaelg er - obbyr vooar, agh obbyr scanshoil. Ta'n shirveish niaght Ghaelgagh ec Radio Vannin çheet magh dy reiltagh, ta ynnyd-thie noa ec Eiraght Ashoonagh Vannin. Chammah as shen ta mee clashtyn dy vel Graham gobbraghey er lioar elley ec y traa t'ayn as ta mee hene bunnys jeant cur Gaelg er lioar dy skeeallyn Yernagh. Ta fys aym ro vie dy vel obbyr myr shoh feer doillee. Ta fys aym neesht nagh vel yn obbyr shoh goll er jannoo agh ayns y traa seyr ain - as cha nel monney traa seyr ain noadyr as ooilley ny reddyn elley ta goll er - as ta fys aym ro vie nagh vel traa seyr dy liooar ec y chooid smoo jin. Agh, nagh vel eh yindyssagh dy nod shin jannoo cho wheesh trooid Ghaelg as cha nel mee er nimraa veg mychione yn obbyr smoo, shen ny brastyllyn oie as yn obbyr ec Bunscoill Ghaelgagh as Yn Unnid Gaelgagh.
Ansherbee, t'eh beggan anmagh nish, agh y red va mee goll dy ghra - roish dou smooinaghtyn er ny reddyn heose - shen dy vel shirveish trooid Gaelg goll er cummal jiu - ec tree er y chlag ec Keeill Pherick, Skylley Pherick. Hee'm oo ayns shen my ta caa eu goll.

NOLLICK GHENNAL!

2007-12-24T22:10:00.001Z

Nollick Ghennal erriu, as blein feer vie
Seihll as slaynt da'n slane lught-thie;
Bea, gennallys as bioyr eu ry-cheilley.
Shee as graih eddyr mraane as deiney;
Cooid as cowryn, stock as stoyr.
Palchey puddase as skeddan dy-liooar;
Arran as caashey, eeym as roauyr;
Baase myr lugh ayns ullin ny soalt;
Cadley sauchey tra vees shiu ny lhie,
Gyn feeackle y jiargan, cadley dy mie.

Shirrey Giootyn Nollick?

2007-12-12T11:05:00.000Z

Foast shirrey gioot Nollick son Gaelgeyr? Crig er yn chiangle shoh:
http://www.cafepress.com/celticinstitute/2288842
As jeeagh fo, ta videocast ayn jeant ec 'Yn Assag Drogh' sy Chanadey - s'treih lhiam gra nagh vel mee hene jannoo podcastyn ny videocastyn ec y traa t'ayn - ta mee ro harroogh, agh bee'm reesht lurg yn Nollick. O, as red elley t'ayn - http://uk.friendsandheroes.com/videos_09.htm.

Yn Ghaelg - çhengey Ellan Vannin

2007-12-12T10:37:00.001Z

Oran Dhomnaill Phadraig - Kathleen MacInnes

2007-11-27T00:22:00.001Z

Ynsagh trooid mean y Ghaelg

2007-11-22T23:40:00.000Z

Ta daa hroddan ayn son coodaghey Gaelg ny h-Erin ec y traa t'ayn. T'eh jeeaghyn dy vel y realtys çhionney er cairyn ny Gaelgeyryn. Myr shen, shegin da Gaelgeyryn cur cooney.
Ta'n chied fer son cummal y leigh myr te; dy vel feme er leighdeyryn gobbragh ayns Nerin Gaelg y hoiggal. Shoh scanshoil son cairyn Gaelgeyryn ayns quaiyltysyn leaigh. Ta shoh ry-gheddyn ec http://www.petition online.com/ cosain7/petition .html
Ta'n aghin elley kiart cho scanshoil, shoh noi oardagh gra nagh noddagh paitçhyn ve ynsit trooid mean y Ghaelg ny lomarcan. Ta shoh ry-gheddyn ec http://www.petitiononline.com/Tumoid/petition.html

Leshtal

2007-11-06T23:55:00.000Z

Gow shiu my leshtal - ta mee er n'gholl commercial. Ta soilsheenyn ry-akin er y volg shoh nish. Cha nel mee jerkal dy ve cosney monney argid, agh ta Adsense gra dy bee fys ec Google er ny soilsheenyn s'cooie da'n lught-lhiah BnG, hmmm ... heemayd ...

Seachd

2007-11-06T22:52:00.000Z

Ta fillym noa magh ec y traa t'ayn enmyssit 'Seachd' (shen 'Shiaght' syn aght screeuee ain) ny "The Inaccessible Pinnacle" sy Vaarle. She Gaelg ny h-Albey çhengey yn 'illym shoh, as myr shen t'eh orrin cooney lhieu my fodmayd. Bare lhiam jeeaghyn er er scaa mooar, vel peiagh erbee ayn as fys er bentyn rish reaghey reddyn myr shoh?

Ansherbee, mannagh vel fys eu, ta skeeal scammyltagh ayn mychione yn 'illym shoh as BAFTA nagh dug eh stiagh son ny Oscars myr fillym 'foreign language' - crig er ny kiangle fo shoh son toilley fys er y skeeal shen.
www.gaelic-arts.com/naidheachdan/395/seachd
www.en.gaelic-arts.com/news/396/seachd
www.list.co.uk/article/2539-seachd/
scotlandonsunday.scotsman.com/letters.cfm?id=160149200

Y Çhapaan

2007-09-23T00:38:00.000Z

Hooar mee chaghteraght ayns post-l moghrey jiu vieh carrey dou ayns y Chapaan. Ta ram sleih sy Chapaan boirit dy vel yn reiltys er chee caghlaa yn bunreaght oc dy scryssey magh Art 9 - shen yn art ta cur stap er Yn Chapaan jannoo caggey noi cheeraghyn elley. S'mie ny focklyn scanshoil t'ayns Art 9:

"As ad Yeearree dy firrinagh son shee eddyr-ashoonagh soieit er corrymys as reajys, ta pobble ny Shapaan cur seose caggey myr cair yn ashoon dy bragh, as baggyrt ny ymmyd jeh lajerys cahnagh myr aght dy hoiaghey arganeyn eddyr-ashoonagh."

Cre'n fa ta'n reiltys son geddyn rey rish shoh? Whall, cha nel shoh mian y theay son shickyrys - agh ta'n reiltys fo smaght America dy bollagh, as ta ny Americanee (whall yn reiltys oc ansherbee) er ve geabbey yn reiltys dy aavioaghey caggoilaght Hapaanagh reesht. Myr shen, ta Reiltys Ny Shapaan er chaglaa ny lioaryn-teks Shennaghys va soilshaghey ny drogh reddyn jeant ec yn arm car yn nah caggey mooar, ta ny politickeyryn syrjey er nghoaill toshiaght goll gys Chiamble Yasukuni reesht (raad ta sidooryn marroo goll er ooashley, Kimmee Caggey Brastyl A nyn mast'oc) as ta ram ynseydeyryn er ve ceaut magh ass nyn obbraghyn son nagh goaill Yn Arrane Ashoonagh ny jannoo curteish rish Y Vrattagh Ashoonagh. T'eh jeeaghyn dy vel plannal son Y Caggey Noi Atchimys foddey ny scanshoil da'n reiltys na cooinaghtyn y theay.

Ansherbee, cha noddym hene jannoo veg. Agh reih mee kuse dy arraneyn ta mie lhiam as ry gheddyn er YouTube. Ta ny kiaulleyderyn ooilley shassoo noi caggey (as, she, shen kiart, ta graih aym er Chitose Hajime!)
as ooilley ass Okinawa ny Amami Oshima - ellanyn fo smaght Tokyo agh foast lesh cultooryn er lheh - as kiaull yndyssagh:
http://www.youtube.com/watch?v=asCRDLs-rEQ&feature=PlayList&p=9804DFB9B4751334&index=0

Lioar Noa Yindyssagh

2007-08-28T11:12:00.000Z

Hooar mee coip jeh'n lioar noa ec Chris Lewin enmyssit "Jough-laanee Aegid as Skeealyn Elley" as foddym insh diu dy vel ee vie er bashtal - as cha nel mee jus' cheet er y Ghaelg aynjee - ta'n skeeal "Jough-laanee Aegid" cho mie as hug eh stap er my chadley dy boallagh riyr - she yn skeeal giare share t'ayn ta mee er lhiah rish traa feer oddey. She skeeal mychione shenn ven ta cummal ayns Doolish, geddyn caa dy cur shilley er bea ny Manninee aegey t'ayn ny laghyn t'ayn jiu. S'aitt erskyn towse ny contortyssyn geiryt urree as ee er n'ghiu yn "Jough-Laanee Aegid". S'mie lhiam "Cullee Noa Yn Ard Ree" neesht - agh cha nel mee er lhiah ny skeealyn elley foast.

Hooar mee my choip ayns The Bridge Bookshop ayns Purt Chiarn. Cha nel mee er n'akin ee ayns shappyn elley foast, agh gyn ourys t'ee ry-gheddyn ec Yn Cheshaght Ghailckagh.

Sengoidelc (Shenn Ghaelg)

2007-08-08T11:14:00.000Z

Ta sym aym er Sengoidelc. Myr shen, chionnee mee kuse dy lioaryn my-e-kione. S'mie lhaim y bardaght ayndaue, as er lhiam nagh vel ny focklyn oc roud veih'n çhengey ain. Shoh çheb ren mee son kied ronney y daan ardghooagh "Messe ocus Pangur Bàn."

Meisse ocus Pangur Bàn,
cechtar nathar fría shaindàn;
bith a menma-sam fri seilgg
mu menma céin im shaincheirdd

Mish as Pangur Bane,
dagh fer rish daan er lheh,
bee e smooinaghtyn rish shelg
my smooinaght hene mysh my cheird er lheh

Ta'n cheeyll jeh 'daan' ayns shoh ny sneissey da 'schlei' ny 'ellyn' na'n cheeyll ta shin cliaghtit rish. Ta'n fockle 'sain' ersooyl nish agh v'an un cheeyll rish 'er lheh' echey agh gobberagh gollrish 'shenn' - cheet roish yn ennym.

Jallooyn 2

2007-06-25T18:35:00.000Z

Coar ny Hastan

Barnee
Famlagh
Garee Breck

Jallooyn - Ayrn 1

2007-06-25T16:26:00.000Z

Dooyrt mee dy vel mee er ve feer ro harroogh er gerrid dy screeu monney artyn er y vlog shoh - agh ren mee kuse dy yallooyn daue lesh my hamraig.

Roar-bree Goll Trooid Glion Tramman:

Jeeaghyn My-Yiass Veih Baie yn 'Arbyl.

Jeeaghyn My-Hiar Vieh Maghal.

Sy Gharey Ayns Skeelley Chreest ny h-Ayrey.

Tooilley fys er William Wood

2007-06-25T15:58:00.000Z

Raink yn lioar "Focklioar Gaelg - Baarle" Jesarn shoh chaie. She lioar feer vie t'ayn as ta mee goaill yindys nagh row fys aym er roish nish. Fo'n ennym echey er y chied dulliag t'eh gra dy nee "Saggyrt y Skeerey Vian" eshyn, ayns Doolish. Hie yn lioar er chlou sy vlein 1950 as t'ee lane dy stoo ymmydoil er y chengey - myr sampleyr, fys mychione ny caghlaaghyn t'eh gra dy dooar eh vie Juan y Ghell - my ta tooilley fys ec peiagh ennagh cur fys dou my sailliu.

Vel fys eu er shoh?

2007-06-18T16:37:00.000Z

Honnick mee yn lioar shoh er ebay, as 'chossyn' mee ish. Vel fys eu urree? Vel fys eu er William Wood? Hie ee er ny cur magh sy vlein 1950. Ta my daa hooill urree as ee cheet. Verrym tooilley fys my-e-kione er shoh sy traa ry-heet.

Cohaghyn Thomas Cook -

2007-06-14T00:05:00.000Z

Ta'n colught Thomas Cook er chur sarey er ny failleydee oc gyn y yannoo ymmyd jeh Bretnish son coloayrtyssyn dellal - eer ayns Bangor! My ta shiu smooinaghtyn mychione goll er turrys sy tourey jarrood yn colught shoh!

Ny Ratchyn TT

2007-06-09T23:25:00.000Z

My leshtal as cha nel mee er chur red erbee er y vlog shoh rish meeyn - ta mee er ve tarroogh agglagh - reaghey stoo son lessoonyn son y chooid smoo, as gynsaghey kuse beg dy Yernish as reaghey lioar skeeal jeant aym. Chammah as shen ta mee er ve goaill aash neesht - as goaill solley ass yn TT. Yeagh mee er ny ratchyn veih boayl jesh ayns Gliontramman - faggys dy Rhumsaa. V'eh yndyssagh (as ta mee cheet er y cheeall kiart ec y fockle) fakin John McGuiness brishey yn recortys 130 mdo, as fakin ooilley yn sleih v'ayn jeeaghyn er, agh s'treih lhiam nagh dod ny ratchyn scapeil veih drogh-haghyrtyn reesht.

Caisht Sonney da ooilley.

2007-04-06T10:30:00.000Z

Ta laghyn seyrey aym ec y traa t'ayn agh cha nel monney traa aym son screeu er shoh. Haink mee my whail Ruairidh MacIlleathain as e ven Kerry (spellal?) kegeeish erash as loayr shin beggan mychione cooishyn Gaelgagh - ta mee er ve jannoo fockleyr Gaelg - Gaelg ny h-Albey as b'vie lhiam cur eh magh sy traa ry-heet. Ta'n emshir vie jiu, as t'eh orrym cooney lesh carey aym kiartaghey as aarlaghey e vaatey roish Jesarn - neemayd goll stiagh y ratch shiaullee Rhumsaa (streisht lhien!).

Ruairidh MacIlleathain

2007-03-22T00:29:00.000Z

Ta screeudeyr yndyssagh er jeet gys Mannin. She Ruairidh MacIlleathain eshyn as t'eh screeu yn claare "Litir do Luchd-Ionnsachaidh" son BBC Nalbin. She sorch dy choorse t'ayn jeant myr screeunyn as podcastyn lesh imraaghyn-coonee ry-hoi punkyn dooillee y chengey - as shen Gaelg ny h-Albey. Er lhiam dy vel shoh yn coorse share t'ayn ry-hoi Gaelg ny h-Albey. T'eh lum lane dy cooishyn symmoil bentyn rish shennagys, sheanse, kiaull, niaght, bardaght, ellenys as ram reddyn elley, as ta dagh screeun mychione cooish anchasley. S'treisht lhiam bee'm cheet ny whail roish t'eh goll erash gys Nalbin Jesarn.
http://www.bbc.co.uk/scotland/alba/foghlam/learngaelic/litir/

San Marino 0 Mannin 1

2007-03-11T18:10:00.000Z

Chossyn Mannin barriaght 0 - 1 ersooyl noi San Marino. S'treih lhiam gra v'ad ceau cullee Sostynagh.

Maire Nic An Bhaird

2007-03-04T02:48:00.000Z

Ta briw beg er n'gheddyn kyndagh Maire Nic An Bhaird, ny ben-ynsee Yernagh. Reil y briw beg noi Maire as son ny poleenyn. Va final keead punt currit urree son "Ymmyrkey Meereiltagh". Dooyrt y briw beg dy row ny feanishee fendeilagh jeeaghyn dy ve firrinagh, agh dy row ny feanishyn ec feanishee ny poleenyn rere nyn geilley. Rere Maire, v'ee goit er y fa dy row ee loayrt Yernish as dooyrt yn offishear ren goaill ee "Ny loayr y leprechaun language shen as loayr Baarle ny Benrein sy cheer eck!" Tra dob ee v'ee goit echey as va cassid jeant e hoi son "Ymmyrkey Meereiltagh". Dob y briw beg ee caa dy fendeil ee hene trooid mean ny Yernish neesht, eer dy vel Yernish y chied chengey eck as v'ee loayrt Yernish tra v'ee goit. Va troddanyn jeant ec sleih cheumooie y whaiyl as dooyrt Marie dy bee ee caggey noi'n vriwnys shoh ooilley y raad gys y Whaiyl Europagh.

Caggey son cowrey-gorrym

2007-02-25T23:43:00.000Z

Ta my 'neen autistagh. T'ee daa vlein yeig d'eash agh cha nod ee gra un 'ockle as cha nod ee goll gys y phremmee ny lomarcan. Sy thie ain t'eh orrin freayll ooilley ny shamyryn fo-ghlass as freayll rick er ooilley nyn stoo foddagh ee brishey. She nane jeh ny aghtyn quaagh eck dy vel ee obbal dy boallagh shooyl tessan raadyn, ny reamys forslit erbee. Ta'n aghtys eck cho doillee dy ren shirveish barroose ny paitchyn lesh femeyn er lheh obbal jee goll dys scoill er y varroose. Cha yindys, eer tra v'eh goaill kiare, ny queig dy leih, cha dod ad ymmyrkey ee eddyr y varroose as dorrys y scoill.

Agh, ny yei shen as ooilley, cha nel shin lowit cowrey-gorrym (kied-parkal son sleih anheiltagh). Ta shoh er y fa dy vel ee abyl shooyl keead meadar, as shen kiart, t'ee abyl my t'ee geearree! Kindagh rish y boirey shoh cha nel mee er ve jannoo monney er y vlog shoh - gow shiu my leshtal - ta'n chooish er ve jannoo boirey orrym.

Agh, cha nel mee er ve jannoo veg ... ta mee er ve n'ynsaghey stoo choearrooder as jannoo aarloo son lessoonyn.

Bee Claare Radio Seyr noa çheet dy gerrid.

Reihys Son Y Choonseil Slattyssagh

2007-02-08T00:31:00.000Z

She thie s'ardjey Hinvaal yn Coonseil Slattyssagh. She ny Kiare as Feed yn thie s'injley ta croo ooilley ny slattysyn noa, agh roish t'ad cheet dy ve nyn leighyn ta feme orroo dy gholl shaghey scruteyrys y Choonseil Slattyssagh - as eisht t'ad currit gys Benrein Sostyn son sthampey rubbyr y chur er. Va queig deiney nyn shassoo son y reihys, agh nish cha nel agh tree. Ta 'Ellan Vannin Jiu' er reaghey sorch dy reihys y theay er nyn ynnyd-thie as ta Charles Cain cosney dy baghtal (t'eh cosney 47% ec y traa t'ayn). Ga nagh vel eh cummal ayns Rhumsaa nish v'eh cummal er Bayr Ghennie rish jeih bleeaney as feed. Mannagh vees eshyn cosney cha bee un olteyr ass y twooie sy choonseil. Chammah as shen she Gaelgeyr ehsyn. Cha nee y blog shoh blog politickagh - agh, son mee hene, ta mee son Y Ywooie as Y Ghaelg!

Walter Clarke

2007-02-01T02:32:00.000Z

Va shirveish ny merriu Walter Clarke ec Keeil Noo Phaayl ayns Rhumsaa, Jemayrt yn Jeihoo Laa as Feed, J.G.
Dobbree Walter son y çhengey Ghaelgagh ooilley e laghyn. Ren eh ram recortyssyn jeh ny shenn loayrtee dooghyssagh son Coimisiún Béaloideasa Éireann, Yn Thie Tashtee - raad v'eh gobbraghey - as Yn Çheshaght Ghailckagh. Hooar eh e Ghaelg veih ny shenn loayrtee nyn hene as v'eh lum lane dy skeealyn my-nyn-gione - as va spoyrt mie ayns ny skeealyn ec Walter tra v'eh loayrt mychione ny laghyn shid. Ta cooin mie aym er Walter loayt mychione Y Ghaaue as mish garaghtee car y traa. Haink eh gys Bunscoill Ghaelgagh dy loayrt rish ny paitçhyn laa braew Fouyir ennagh nurree, as va shen y keayrt s'jerree dy naik mee eh. Cheayll mee dy row eh çhing agglagh jus' roish traa ny Nollick, as va mee son screeu rishyn, agh atreih, cha ren mee. T'ad gra dy row yn Manninagh rieau yn laa lurg y vargey. Cha row Walter - Son choud as ta Gaelg foast bio bee shin bwooisal dy row Walter ayn as son yn obbyr jeant echey.

Niaght Trimshey

2007-01-26T01:28:00.000Z

S'treih lhiam cur y niaght trimshey shoh daue. Hooar Walter Clarke baase Jemayrt, Yn Trass Laa as Feed, Jerrey Geuree. Cha nel fys aym ec y traa t'ayn er shirveish ny merriu er-e-hon, agh bee'm cur tooilley fys er y vlog shoh tra t'eh ry-gheddyn. Shee Yee er.

No Béarla

2007-01-21T00:00:00.000Z

Va mee jus' jeeaghyn er claare çhellveeish jeant ec TG4 ayns Nerin enmyssit "No Béarla" (No Baarle). Ta dooinney ayn loayrt Yernish car y traa as eh jannoo turrys mygeayrt Nerin. T'eh er n'gholl voish Divlyn gys Beeal Feirshtey rish nish as bee eh ayns Doon ny nGhoal sy çhiaghtin shoh çheet. S'mie lhiam y kiaull as focklyn ny arraneyn ta goll lesh y skeeal, myr sampleyr, "I walk a lonely road" lesh ny credityn-fosley. Agh, nagh lhig eh ve lhiu nagh vel eh çheet quail lesh Gaelgeyryn er fud ny çheerey - ta ram jeu ayn (kuse jeu nagh toiggal monney agh palchey dy 'leih arryltagh dy phrowal), as ymmoddee paitçhyn. Agh, gyn ourys, ta ram sleih noi çhengey erbee nagh vel Baarle.

Ta fo-screeu (subtitles?) ayns Baarle ayn agh er lhiam dy bee shiu toiggal y chooid smoo jeh'n Yernish eer nagh vel oo er n'ynsaghey Yernish - Hoig mee ram jeh gyn lhiah as cha nel monney Yernish aym.

Fy Yerrey!

2007-01-11T20:36:00.000Z

Blein vie noa!

Waahl, va mee jeeaghyn roym gys blein noa er y ouyr dy row 2006 cho creoi dou, benntyn rish y coorse PGDE ren mee, as ymmoddee reddyn elley. Ta mee greesit mysh y vlein noa er y fa ta lioar ny ghaa bunnys jeant aym b'vie lhiam cur magh, as ta mee jerkal dy bee fockleyr Gaelg-ny-h-Albey / Gaelg jeant aym roish y Nollick shoh cheet neesht. Share ny shen, ta mee er n'ghynsaghey ymmoddee reddyn mychione jannoo lessoonyn coreggyr, lessoonyn trooid yn eddyr-voggyl, claareyn chellveeish dy bee shiu abyl jeeaghyn er liorish yn eddyr-voggyl, as reddyn elley jeh'n lheid. T'eh jeeaghyn dy bee yn eddyr-voggyl feer ymmydoil dooin sy traa ry-heet.

Ren mee feddyn magh jiu dy oddagh shiu jeeaghyn er y vlog shoh ec ny scoillyn ayns Mannin nish! Myr shen, by vie lhiam cur failt mooar er dagh lhiahder noa ta cheet gys ny duillagyn shoh liorish co-earrooder scoill.

Ta blog Gaelgagh elley ayn ec Brian Stowell - broo er y chiangle "Blog Vrian" son tooilley fys.

By vie lhiat hene jannoo blog myr shoh? Screeu rhym son fys er yn aght y yannoo as foddym cur fys dhyt (ayns Baarle ny Gaelg). My ta fys eu er aght erbee dy yannoo reddyn ny share na ta mee jannoo ec y traa t'ayn cur fys dou my-e-chione ec manxjp@yahoo.com

Jus' roish ta mee cheet gys kione y phost shoh b'vie lhiam cur magh my yeearreeyn share son Walter Clarke as Adrian Pilgrim dy vel feer ching ec y traa t'ayn.

Nollick Ghennal!

2006-12-24T13:19:00.000Z

Da ooilley ta lhaih Blog ny Gaelgey - Nollick Ghennal, Nollaig Chridheil, Nollaig Shona, Nadolig Llawen, Nadelik Lowen, Nedeleg Laouen.

Y Fonz Ayns Mannin 1854

2006-12-10T14:05:00.000Z

Haink fys aym dy gerrid dy row Y Fonz (ass "Happy Days") ayns Laksaa sy vlein 1854. Ta sleih elley gra nagh vel mee kiart as she Elvis ta mee fakin er y phabyr feed punt. Ta mee lane shickyr dy re eshyn y Fonz. Ansherbee, jeeagh er as vaik diu hene.

Cooish

2006-12-04T01:25:00.000Z

Va "Cooish" - yn feailley Gaelgagh - ayn yn çhiaghtin shoh chaie. Va ram taghyrtyn goll er as hie mee hene dys kuse jeu.

Ec co-hirrey "Arrane son Mannin" va daa arrane currit stiagh. Hooar "Veih'n Chree" y varriaght. Ta Veih'n Chree daa ven - Chloe as Cinzia as va'n arrane oc enmyssit "Oirr ny Cruinney" (liorish Breeshey Maddrell, lhiams).

Ec yn Leaght Ned Maddrell va Wilson MacLeod ass Ollooscoill Ghoon Edin ayn as eshyn loayrt mychione ny reddyn goll er ayns yn RU, Pnyh-E, as cheeraghyn elley benntyn rish chengaghyn sloo ymmydit.

As, oie Jeheiney va cuirrey kiaull mooar ayns Purt ny h-Inshey sy Halley Keead Vlein, lesh King Kiaullee, Christine Primrose ass Ellan Lioas as Moirrey as Eileen Begley ass Kerree.

Shen y fa nagh screeu mee monney dy gerrid.

Claare 5 Radio Seyr

2006-11-28T01:17:00.000Z

Gow shiu my leshtal my ta shiu er n'uirraghtyn traa foddey son claare noa Radio Seyr. Va mee son jannoo coloayrtys marish Adrian Cain, agh s'trieh lhiam gra dy vel eh ching agglagh. Ren mee Claare 5 marish Juan y Crellin Balley Keeill Yude, sharvaant mie son y Ghaelg rish ymmodee bleeantyn. S'treisht lhiam dy bee oo coardail rhym dy vel y blass sy Ghaelg echey feer vie.

Loayrt dy firrinagh t'eh orrym gra t'eh er ve foddey roud neayr's ren mee Claare 4. Gura mie eu as ta shiu jeeaghyn er shoh reesht! Cha nel kiaull erbee er Claare 5, agh lhiams dy vel eh foast feeu geaishtagh rish son kiaull ny Gaelgey hene.

chagteragh jerree bentyn rish yn ard-reihys

2006-11-27T21:00:00.000Z

Waahl, t'eh jeant nish. Cha nel monney er cheagley, agh bunnys ayns Glion Faba hene. Hooar Mnr Boot 525 voteyn jannoo 41 ass 100. Ta mee jerkal dy bee shin clashtyn ny smoo veih sy traa ry heet. Stuir eh yn ceagley eddyr politig Sostnagh as politig Vanninagh feer vie as s'beg nagh row eh cosney.
Hooar Mnr Anderson y varriaght, agh cha ren eh cho mie as ren eh ayns 2001.

Ard-Reihys Vannin 2006

2006-11-23T23:59:00.000Z

Chossyn Philly OHK as Peddyr OHK .
Jeant dy mie!
Ta mee goaill bine er nyn son.

Dooinney Yindyssagh

2006-11-21T00:10:00.000Z

Ta mee cummal ayns Glion Faba, as ta daa ghooinney shassoo son y chiare as feed. Ta un jeu dooinney mirrilagh. Ta'n ennym er Geoffrey Boot, ass Kent ayns Jiass Sostyn. T'eh gra ta shey GCE jeig echey, t'eh stiureyuder etlan ard-ghooagh as t'eh er ve sheer chummal ayns Mannin rish bleeantyn as bleeantyn. Ta "Manx Solutions for Manx Problems" y sleih-gerrym echey. She, t'eh dooinney yindyssagh t'ayn as eh er ve ny choonseilagh Tory rish daa vleeaney jeig ayns Kent. Agh choayll eh y reihys ayns Mee Voaldyn 2003 foddee dy row eh ayns y heer neu-chiart. She dooinney er lheh t'ayn nagh nee!

Ta'n dooinney elley David Anderson. S'mie lhiam dy vel y jees jeu son y Ghaelg.

Hug mee feysht da Geoffrey mychione Gaelg, as dreggyr eh lesh fockle ny ghaa! Va "fastyr mie", "traa dy liooar" as "hop-tu-naa" echey, as dooyrt eh dy vel eh son y Ghaelg.

Va David Anderson gra dy vel Bunscoill Ghaelgagh yndyssagh as t'eh son y Ghaelg neesht.

Moot ec Liet-Lavlut

2006-10-17T22:50:00.000Z

Ogh, Cha nel ad nyn lomarcan! Va mish as lhaihdeyryn y vlog shoh maroo - ayns spyrryd ansherbee.
Shoh kiangle:
http://www.liet.nl/media.php?l=7

Gaelg ny h-Albey

2006-10-17T22:32:00.000Z

Ta reddyn goll rhymboo ayns Nalbin:

http://www.bord-na-gaidhlig.org.uk/Cochomhairle/GGLPE_smaller.pdf

Marish ny fiddleryn Oie Jesarn

2006-10-01T23:46:00.000Z

She oie vie v'ayn sy Thie Bane ayns Purt ny h-Inshey yn Jesarn shoh chaie. Va possan Morris ayn voish Sostyn jannoo rinkey quaagh as goaill arraneyn cho dree b'egin daue ve ayn y hoiggal! Va eer dooinney ayn scrabey er mandalyn as mooadagher echey! Tra goaill ad toshiaght er dollane dree mychione Billy ennagh boght goll ersooyl lesh muscad caggey y yannoo son y chrooin v'eh jeeaghyn dy row peiagh ny daa er çhee toshiaghey feer caggey sy thie oast hene. Lhiams dy hug dooinney mooar as folt leeah er (foddee ta enney eu er y dooinney ta mee cheet er) fockle ayns cleaysh Manninagh, as tra va tammylt kiune ghow ny fiddleryn toshiaght. Va nearey er ny Sostnee tra hoig ad cho mie ta'n kiaull ta shin cliaghtit rish ayns Mannin! As shegin dou gra nagh vel mee rieau er clashtyn fiddleryn cho mie as shen.

Coorse Oolpan

2006-09-30T02:57:00.000Z

Va chaglym ec y vunscoill oie Jedein mychione coorse noa dy bee currit er bun lesh cooney voish colught Albinagh enmyssit Deisal. Bee yn coorse shoh jannoo ymmyd jeh'n 'ys ta ny Bretnee er chosney trooid ny bleeantyn lesh nyn goorse Wpan. Cha nel monney reddyn noa ry-gheddyn sy choorse shoh, as son y chooid smoo ta ny aghtyn as stoo goll er ynsagh ec y traa t'ayn. Agh, bee yn choorse noa cur ooilley y fys as ny aghtyn ain ry-cheilley as reaghey ny lessoonyn syn oardeyr share. Lhiams dy bee coorse myr shoh scanshoil er yn oyr nagh vel argit ry-gheddyn son cooney fir ynsee cur coorseyn ry-cheilley ec y traa t'ayn. She mish my 'er ynsee, as t'eh scammyltagh nagh vel traa dy liooar ain aarlaghey lessoonyn. S'treih lhiam nagh vel peiagh ec y reiltys arraltagh dy chooney shin hene cur coorse mie ry-cheilley, agh shen yn aght ec Reiltys Vannin, as my t'ad arraltagh ceau argid son y hengey, smie lhiam.

Cheayll mee dy vel ad son ceau argid er duillaghyn eddyr-voggyl noa neesht. Cha bee shiu goaill yndyss dy vel argid dy liooar ayn ec y reiltys son reddyn myr shen - chouds nagh vel shiu nyn Vanninagh! My t'ou er chlashtyn rish Radio Seyr bee fys eu hannah, agh ta reamys seyr dy liooar son podcastyn as y lhied ayn. Chammah as shen, ta blog myr shoh slane seyr. My ta peiagh ennagh ayn shirrey toilley fys mychione jannoo blog, ny podcastyn, ny videocastyn cur fys dou - cha bee oo cosney ping agh cha bee eh costal monney noadyr.

Stashoon Chellveeish

2006-09-09T10:59:00.000Z

Shoh kiangle son stashoon chellveeish creeley er'n web 'sy Ghaelige.
http://www.tg4.ie/webt/webt.htm

Kiaull Nastee

2006-09-01T10:50:00.000Z

Vel shiu shirrey stoo kiaullee? Shoh ny kiangleyn ta mee er gheddyn - cur fys dou my ta kiangleyn mie elley ayn - stoo bentyn rish y hengeyghyn Cheltiagh.

http://www.myspace.com/maryjanelamond
http://www.myspace.com/nadaislingean
http://www.myspace.com/theguireans
http://profile.myspace.com/index.cfm?fuseaction=user.viewprofile&friendID=40625800
http://music.download.com/millahuilerud/3600-8719-100260698.html?tag=MDL_quickurl&jFunc=playList&jParam=song-100949542&name=Songs%20by%20Mill%20a%20h-Uile%20Rud
http://profile.myspace.com/index.cfm?fuseaction=user.viewprofile&friendid=62920014
http://profile.myspace.com/index.cfm?fuseaction=user.viewprofile&friendid=74632816
http://www.ramsisle.com/celtic/webradio.htm#ContinuousMusic

Myspace - Skeeal

2006-09-01T10:18:00.000Z

Hooar mee ghuillag skeeal nagh row fys ayms roish son Skeeal. She possan kiaull t'ayn as ta tree arraneyn lioroo ry-gheddyn ec y voayl myspace oc. S'feeu clashtyn roo dy 'bio' my caa erriu. Shoh y kiangle:
http://profile.myspace.com/index.cfm?fuseaction=user.viewprofile&friendid=78598161

Niaght

2006-08-30T10:33:00.000Z

Ta'n chullee noa ec skimmee bluckan coshey ashoonagh ny Albey goll er creck jiu, as ta'n 'ockle ALBA ry-akin er ny lheintyn. S'cooie shen er y fa dy vel cooid vooar jeh'n Arm Breck (Tartan Army) ass yn Ghaeltaght, as share lesh ny eiyrtyssee Rangers Sostyn harrish Nalbin (t'ad gra "ny Jamysee" ny "ny Teuchters" rish y sleih g'eiyrt er y skimmee ashoonagh oc hene!) , as son y chooid smoo share lesh ny eiyrtyssee Celtic Nerin. S'quaagh y stoo politickagh bentyn rish bluckan coshey ayns Nalbin, agh s'mie dy vel yn "ockle er ny lheintyn fy yerrey.

Gow my leshtal as cha nel mee er screeu monney er y vlog shoh er gerrid, va mee obbragh er reddyn elley, as goaill boggey ass yn emshyr vie v'ayn.

Ynnyd Thie Noa son Gaelg ny h-Albey

2006-08-04T08:26:00.000Z

A bheil Gaidhlig agad?
Shoh duillag thie noa enmyssit "Alba na Ghaidhlig".
http://www.gaelic-scotland.co.uk/

Eary Cushlin

2006-08-01T10:23:00.000Z

S'treih lhiam gra nagh vel tooilley fys aym, agh lhiams dy bee coorse Ghaelg cummit ayns Eary Cushlin y Jeheiney as Jesarn shoh. S'foddee dy vel tooilley fys ry-gheddyn ec Undinys Eiraght Vannin.

Te Scruit - Liooar Noa

2006-07-30T16:16:00.000Z

Hooar mee cop jeh'n liooar noa liorish Graham Naylor enmyssit "Te Scruit". She nuy skeealyn giarey t'ayn. Ta mee er lhiah yn chied 'er jeu as t'eh mie er bashtal. Cha nel mee shickyr foast c'raad ta copyn ry-gheddyn. Hooar mee my chop voish y dooinney eh-hene riyr ec yn Chruinnaght. T'eh costal kiare punt jeig, agh t'eh jeant feer vie lesh coamrey creoi. S'mie lhiam dy vel tooilley as tooilley stoo-lhiah ayn dooin sy Ghaelg. Jeant dty mie ghooinney!

Yn Chruinnaght

2006-07-27T13:23:00.000Z

Ta'n Chruinnaght foast goll er rish kione yn chiaghtyn shoh. Hie mee gys cuirrey kiaull ayns Purt ny h-Inshey oie Jemayrt as v'eh mie er bashtal. Shoh kiangle: http://www.ynchruinnaght.com/

Beirut

2006-07-19T18:38:00.000Z

Ta ny shivoilee Lebanon lane gyn smaght er ny taghertyn jannoo orroo-hene ec y traa t'ayn. T'ad feddyn nyn hene goit ec voir y sterrym reeshtagh as jannoo aarloo rish taghyrtyn foddey s'meesey ry-heet. Dy beagh ny laghyn dorraghey cheet er ash orroo bee'm lane dyn toiggal cre'n fa t'ayn. Nagh vel toiggal ain er ny taghyrtyn ayns Iraq as Afganistan as y lheid. Cha nee ny Lebanonee cadjin nyn 'atchimeyryn'. My ashoon erbee jannoo noidyn ass dy chooilley pheigh ayns ashoon elley she adsyn aggairagh. Myr shen, er lhiam dy nee Reiltys Israel cho olk as atchimeyryn erbee t'ayn.

Gynsagh er-linney 2

2006-07-10T21:23:00.000Z

http://www.japonin.com/en/joy.html
Cha nel mee shickyr kanys ta shoh gobbragh, agh ta mee smooinaghtyn dy vel eh aght mie dy ynsaghey chengey erbee. Ta mee smooinaghtyn mychione prowal lessoon ny daa as ny yei screeu mychione.

Gynsagh er-linney

2006-07-10T20:03:00.000Z

Hooar mee mooarane fys mychione gynsaghey Gaidhlig er-linney tra va mee ayns Glaschu. Shoh kiangle mie son reddyn noa: http://www.ltscotland.org.uk/gaidhlig//index.asp Mannagh vel kuse dy Gaelg ny h-Albey eu t'eh dooilley y hoiggal, agh shoh reddyn aashagh dy liooar y hoiggal eer cha nel un 'ockle eu. Shoh gamman enmyssit Aig an Fheill, ny 'Ec yn 'eailley' (cur ennym, ny ainm, erbee ayn tra t'eh briaght er e hon, as cha nel feme eu typeal red erbee sy reamys son fockle-follit, ny facal-faire):
http://www.ltscotland.org.uk/gaidhlig/stuthantaic/Goireasan/aiganfheill/XML/game.asp
as shoh skeealyn giarrit:
http://www.ltscotland.org.uk/gaidhlig/GLPS.asp
Lhiams dy beagh eh feeu diu jeeaghyn er dy chooilley stoo ec ny kiangleyn shoh.

Claare Kiare Radio Seyr

2006-07-07T22:07:00.000Z

Crig er y kiangle erskyn Claare Kiare Radio Seyr y chlashtyn. Ren mee shoh marish Phil Kelly. Ta goaill cowag mychione kiaull as she tree peeshyn kiaull mie t'er yn chlaare. Ta'n chied 'er liorish CloanRanald ass Nerin (possan dy row cloie ec y chooish nurree), y nah 'er liorish Crosby as Stills as Nash (agh, atreih, dyn Young) as y fer s'jerree liorish Capercaillie ass Nalbin. Ta Phil gra nagh row eh rieau ny hippy agh ta mee coontey shen dy nee breag beg echey er y fa dy vel cooinaght aym er fer ynsee ec Scoill Raad Albert as folt as faasaag liauyr doo echey dy ren ceau carraneyn as troosyn-flare as va'n un ennym echey gyn ourys. S'treih lhiam gra nagh vel eh cliaghtey cloie e vanjo noadyr. Cheayll mee skeeal voish peiagh ennagh dy row eh ny chloiedeyr vanjo lane vie sy shenn laghyn, agh t'eh gra nagh row eh rieau cho mie as cheayll mee as heil mee. Well, ansherbee v'eh cowag mie ain as s'treisht lhiam dy bee shiuish goaill boggey ass myrgeddin. Gura mie mooar ghooinney.

Quoi bee y nah ghoaldagh er Radio Seyr? T'eh reaghit hannah, as ta mee jerkal dy bee kiaull cloieit nagh row shiu rieau er nyn glashtyn, agh heemayd my ta ...

Jeeagh er yn Reamys Shoh!

2006-06-28T22:53:00.000Z

Hooar y blog shoh 'plug' jesh er Claare ny Gael liorish Bobby Bob as myr shen begin dou cur reddyn noa er! B'vie lhiam jannoo cowraghyn goll rish y sampleyr fo'n phost shoh dy chreck ec Magher Tinvaal, agh s'foddee nagh bee traa dy liooar aym.

Ta mee er chee creeley claare noa Radio Seyr dy ren mee riyr marish Phil Kelly. Bee y chlaare jeant aym dy gerrid.

2006-06-28T22:36:00.000Z

NATSEEYN FOW THIE!

CEAU MAGH YN BNP

BNP ayns Doolish

2006-06-25T11:41:00.000Z

Ta skeeal ayn dy row yn BNP (Partee Ashoonagh Ghoaldagh) cur magh screeunyn cheu mooie Marks & Spencers y shiaghtan shoh chaie. Hirr mee smoo fys mychione y BNP as Mannin voish yn ynnyd-thie oc as ta brattaghyn Vannin goll er creck er! S'foddee dy bee feme ain er cur er bun possan myr 'anti-fascist action' ayns Mannin. Cur post-l dou my ta shiu son jannoo red ennagh.

Ta mee er ash!

2006-06-21T00:38:00.000Z

Gow my leshtal my va shiu jerkal red ennagh noa er y vlog shoh sy vee shoh chaie. Va mee ayns Glaschu jannoo coorse PGDE. T'eh jeant aym nish, bwooise da'n Chiarn, as lhiam dy beagh eh feeu dou goaill fea rish tammylt beg. Er y fa shen nagh bee claare noa Radio Seyr er shoh derrey kione y vee shoh cheet. S'mie lhiam jeeaghyn er y vluckan-coshey ta goll er ec y traa t'ayn, ga dy vel y Shapaan er chee goll magh hannah, as shen ny yei nagh bee y ven ayms jeeaghyn marym er gamman erbee: S'foddey share lhee Wimbledon. Cha nel mee coontey monney jeh bassag. Cha nel agh un chellveeish ain as myr shen ta mee goaill padjer dy bee ny Shapaanee feddyn deanyn dy liooar sy nah ghamman oc!

Doilleeid lesh Radio Seyr son ymmydeyryn PC

2006-05-20T16:52:00.000Z

Hooar mee fys mychione doilleeid cloie Radio Seyr er PC. Ta kuse dy leih geddyn kishtey-chagheraght gra "click to run an activeX control on this site" as lurg criggal er ta'n duilliag skellal rish. S'aashagh jannoo shoh kiart. Foshil Windows Media Player as crig er yn side er y cheu yesh jeh mullagh yn uinnag, eisht reih "tools", eisht, "options", eisht "file types", crig er "select all" as eisht "ok". Lhiams dy bee eh cloie gyn boirey ny yei shen, my ta.

Cahnys syn Ellan Skianagh

2006-05-18T23:50:00.000Z

Ta Comann nam Parant Shleite syn Ellan Skianagh gleck son ceaghley y Bunscoill Shleite rish bunscoill Ghaelg ny h-Albey. She y vunscoill s'faggys da Saoghal Mor Ostaig t'ayn as ta'n chooid ny smoo jeh ny paitchyn goll er gynsaghey trooid mean Ghaidhlig hannah. Quoi ta gleck noi ad? She parantyn son mean Baarle, gaccan dy veagh ad eiginit gimman feed minnid ny s'odjey sheese y raad gys scoill baarleagh. Ta aghin ayn son cooney y lught Ghaidhlig ec : www.petitiononline.com/sleite/petition.html

Cur nyn ennym er my salliu ...

Mannin Aboo!

2006-05-07T23:50:00.000Z

She Skimmee Bluckan Coshey Mannin dy bee cloie son Sostyn ayns Cappan ny Slystyn EUFA myleeaney. Hooar ad barriaght 0-4 harrish Countee Cambridgeshire jea (Jedoonee), lesh deanyn liorish Jonny Myers as Nick Hurt as Callum Morrissey. Va shen y gamman jerrinagh sy English Football Association National League Systems Cup.T'ad lane cliaghtit rish cloie ersooyl, as gyn ouyrys nee ad cloie dy mie ayns Prague ny s'anmey myleeaney.

She Nigel Shimmin y captan, as ta mee goaill moyrn gra dy re eshyn my 'er-mooinjerey!

She red quaagh Skimmee Mannin cloie as ad ceau cullee Sostyn, as cha nel y skimmee bwooisit lesh shen noadyr. Nagh bee eh ny share cloie myr cheer kiart ny myr countee Sostnagh? T'ad jeeaghyn dy baghtal dy vel ad mie dy liooar. Nagh nee fer ayn son reaghey shen?

Claare Tree Radio Seyr

2006-05-05T22:52:00.000Z

Ta Claare Tree Radio Seyr jeant aym. She coloayrtys marish Brian Stowell t'ayn as eshyn cur sollys dooin er yn chiaull share lesh. Nagh bee yindys erriu dy reih eh kiaull Manninagh noadyr. She arrane risque y chied jeu - she "Hie Mie Stiagh" liorish King Chiaullee, myr shen cha noddym screeu sheese focklyn yn arrane er shoh. Reih eshyn "Flitter Daunsey" liorish Mactullagh Vannin as "Fin as Oshin" liorish Y Mollag Band myrgeddin. S'treisht lhiam s'mie dy liooar lhiuish Radio Seyr. My t'ou eaisht rish as son jannoo coloartys rhym er podcast cur fys dou my salliu as foddagh shiu ve y nah ard-rollage Radio Seyr!.

Ta ny h-Albinee Troggal Bunscoill er Lheh.

2006-04-28T13:18:00.000Z

Ghow ad toshiaght troggal bunscoill noa yn shiaghtan shoh ayns Inverneesh. She yn chied scoill jeh un scoill jeig t'ad troggal sy tree bleeaney shoh cheet. Bee ad aarloo son ynsagh lurg y Chaisht. Bee eh yn chied scoill jeant er lheh son ynsagh trooid mean Ghaelg ny h-Albey. Bee shiaght shamyryn-brastyl, halley cooishyn cultooral Ghaidhlig, shamyryn da possanyn cloie as studio recortys ayn. Nagh veagh troggal myr shen jesh ayns Mannin!

Aareayrt y Reiltys

2006-04-17T17:55:00.000Z

Ta skimmee ayn jannoo aareayrt y Reiltys ain as bee eh orroo dy gerrid yn chied paart jeh'n vriwnys y chur magh. Ta shey olteynyn sy skimmee. She feer ven as gheiney seyrey (tree jeu lesh gongyn Goaldagh, my ta) agh, va mee smooniaghtyn, quoi Dick Horsnell? Ren mee beggan ronsaghey as cha nod oo credjal y lhied. She feer ashoonagh eshyn. Ta'n ynnyd thie echey lum lane dy stoo vareltagh noi peccee arraghey stiagh voish yn Unnaneys Europey as skeallyn mychione breearrey yn leighaltys echey rish e heer hene. Agh, cha nee Manninagh eshyn, she Sostnagh t'ayn, ga dy vel eh cummal ayns Mannin, as roish haink eh shoh v'eh cummal ayns Yn Ollynn, as roish shen ayns America. Myr shen, t'eh jeeaghyn t'eh noi peiagh erbee arraghey stiagh heer elley, er lhimmey jeh hene! T'eh gaccan dy vel yn R.U. ro yingit ec y traa t'ayn, foddee she y fa daag eh ee.

Nagh vel eh quaagh dy ve olteyr jeh skimmee gobbraghey son Reiltys Vannin ronsaghey gaueyn as caayn cheet rooin sy traa ry-heet, agh ec y traa cheddin dy ve er breearrey eh hene ny Sostnagh leighalagh? C'red ta jannoo orrin?

Feish Chiaullee as Chohirrey Bardaght

2006-04-15T23:46:00.000Z

Ta cohirrey bardaght Béal Áth na mBuillí goaill toshiaght yn hoghtoo laa as feed Mee Averil. T'eh cummit dagh vlein ayns Nerin, as ta'n vlein t'ayn she Seamus Heaney (cummalagh Aundyr Screeuaght Noble) yn cuirreydagh er lheh. T'eh ro anmagh diu cur stiagh daan nish, agh foddagh mian y ve lhiu dy jig Cathy Clugaaish erash as cur lhee aundyr. http://www.strokestownpoetryprize.com/

She red gollrish Cohirrey Arrane Eurovision ta Feish Chiaullee Liet-Lavlut (sy Toolyn ayns cheer ny Sami). T'eh forslit da chengey erbee er cheu yn vyrnearroo ayns cheer Europey. Nagh bee ee toshiaghey rish meeyn agh she Jelune (laa ny nuyr) yn laa s'jerree arrane dy chur stiaght er e son. Myr shen, ta foast traa dy liooar ayn arrane y screeu, mannagh vel shiu er jannoo hannah! http://www.liet.nl/
My leshtal my t'an niaght shoh cheet deu yn laa lurg y vargey, agh bee blein elley.

Ynnyd-Thie Mercator

2006-04-12T09:18:00.000Z

Shoh ynnyd-thie Mercator Education. She ynnyd son fir ynsee ny chengaghyn ny sloo Yn Europey. Ta niaght, couyryn ynsagh, boayrd-chaghteraght, fys mychione argid ry-gheddyn as y lhied ayn.

Dubai

2006-03-29T19:22:00.000Z

Tra va mee cummal sy Çhapaan va fer ynsee karate aym. She shenn doinney v’ayn as haink eh dy ve fer ynsee vie dou. Cha dynsagh agh aghtyn caggoil noadyr. Hooar mee fys er Zen, Reiki, Seitai (gollrish doralley-Sheenagh agh gyn jialgyn) as ymmodee reddyn elley. Laa dy row, as mish ny hoie as er my glioonyn er laare creoi er e vealloo, dinsh eh dou yn skeeal shoh:

Keayrt dy row ayns Y Çheen va Impir niartal ayn as v’eh lesh hene dy row eh lane vie ynsit er reddyn ellynoil. Ec yn un traa, va ellyneyr yndyssagh cummal ayns balley beg foddey jeh’n ard-valley impiroil. Tra haink ardghoo y dooinney shen rish yn Impir hug eshyn oardagh er dy jig huggey, feysht mooar er ellyn y reggyrt. Vrie yn Impir jeh; “Benntyn rish jallooyn ghooinney, cre’n red s’aasey y yannoo, as cre’n red smoo doillee y yannoo?”

Smooinee yn ellyneyr rish tammylt as eisht dreggyr eh: “She jallooyn jeh jouil s’aasey y yannoo, as jallooyn jeh moddee smoo doillee y yannoo”.

Shen ny yei, as mish foast ny hoie er y laare creoi, my hone gaase strimmey er my cassyn, dooyrt eh dou “smooinnee er keeal yn skeeal shoh”. Fy yerrey, haink freggyrt dou. “S’doillee jannoo red ennagh aalin as mie as dooie, as she ny s’aasey gyn towse jannoo red ennagh taishbynagh, neughraysoil as ard-yindyssagh.”

“She”, dooyrt eh “shen paart jeh’n chooish. Agh ny jarrood un red scanshoil elley, as ta shoh benntyn rish dy chooilley red trooid dty vea. She graih t’ec moddey mie, agh cha nel red mie erbee ec jouyl.”

Waahl, va mee jeeragh lhaih mychione ny reddyn goll er ayns Dubai, as chooinee mee yn skeeal shen. She reddyn neu-chredjallagh goll er hroggal ayns shen ec y traa t’ayn, liorish laboree boghtey obbragh son faillyn treih fo smaght creoi . T’ad jerkal ymmydee joarree dy heet er etlanyn, agh ec y traa cheddin t’ad cur yn ennym ‘eco-city’ er. She flaunys ny berçhee Dubai, gyn keeshyn as gyn cree.

Crig er ny kianglyn shoh son tooilley fys:
http://hrw.org/english/docs/2006/03/28/uae13090.htm
http://gvnet.com/humantrafficking/UnitedArabEmirates.htm

As ny jarrood shoh:
http://www.dcci.ae/contents.asp?Page=news1225&cookie%5Ftest=1

Kiaull Punk Ghaelg ny h-Albey

2006-03-25T23:23:00.000Z

Mie lhieu kiaull punk? She shenn punkyn Albinagh ta Oi Polloi, as t'ad goaill arranyn ass Ghaelg ny h-Albey. S'mie lhiam yn arrane 'Carson?' (ny 'C'hon? / Cre hon?'/ 'Cre'n fa' sy hengey ain.) She Mil a h-Uile Rud (Stroie Dychooilley Red) possan elley t'ayn. T'ad cummal ayns Americaa as jannoo kiaull punk ass Ghaelg ny h-Albey myrgeddin (waahl, she kiaull lhiams!) Ta'n ynnynd thie oc: http://www.millahuilerud.com/.

Reayrt Elley

2006-03-25T23:04:00.000Z

Shoh ynnyd thie fir dooie Yn Austrail jannoo chionraa er berçhys geidit as cultoor cailt liorish Yn Impiriaght Ghoal: http://sydney.indymedia.org/node/35380
Share lhiam 'berçhys geidit' harrish 'co-unnanys' son 'commonwealth'.

Kiaull Tradishoonagh

2006-03-25T22:27:00.000Z

Ta'n ynnyd thie UEF gaase ny share; http://www.manxheritage.org/main-menu.htm

Gunnyn ny Manninee

2006-03-22T12:56:00.000Z

Hooar Skimmee Vannin y bonn (ny medal) ruy-dhone liorish nyn gunnyn jea. Ren Trevor Boyles as David Walton dy mie son Mannin as nish ta shin jeeragh erskyn Pakistan sy claare ny punkyn. Bannee mee!

Bhoy Airhey!

2006-03-22T12:46:00.000Z

Chossyn Mark Cavendish y ratch scratch sy gammanyn Melbourne. Jeant dty mie ghooinney!

Gow my leshtal

2006-03-05T23:54:00.000Z

Ta ny smoo ny jeih as feed clashtynee er laadey claare nane as claare jees Radio Seyr. Myr shen, va mee son jannoo claare tree ny share er lheh liorish Mac. S'treih lhiam gra cha nel eh er ngoll cho mie as roish. Ta foast doilleeidyn aym kianglit rish jannoo ymmid jeh formattyn anchasley. Gow my leshtal. S'treisht lhiam dy bee y nah claare ry-gheddyn dy gerrid.

Bee mee ayns Nalbin eddyr kione y shiaghtin shoh as y Chaisht. Bee postyn currit er shoh ny yei shen as ooilley. Ny jarrood dy dod oo post er shoh neesht, crig er y cowrey fo y phost as cur 'comment' ayn.

Bee cooish ayn y jeihoo laa ec y Vunscoill, bee shen giense-lunney son ny daa lioar noa liorish Brian. Jeeagh er 'BlogVrian' son tooilley fys mychione shen. http://blogvrian.blogspot.com/

Ynnyd-Thie Noa liorish UEV

2006-02-28T21:10:00.000Z

Ta Cinzia er jannoo ynnyd-thie noa son kiaull, as t'eh jeeaghyn lane vie ymmydoil.

Iomairt Cholm Cille

2006-02-28T19:26:00.001Z

Bee çhaglym Iomairt Cholm Cille ayns Beeal Feeirshtey er y hoghtoo laa as y nuyoo laa yn vee shoh. Chouds as ta fys aym, cha row ad cur monney geill er ny Manninee ec y toshiaght, agh tra va mee ayns Glaschu haink mee dy whail lesh ram sleih, Erinee as Alabnee as anaase oc er Mannin. Cheayll mee dy row yn fer smoo noi ny Manninee tra hug ad er bun va shen fer thammag Çhiarn Watson, kianglit rish eshyn ve ny oalteyr Partee Obbraghys Goaldagh. Myr shen, ghow mee boggey tra cheayll mee dy row eh goit ec ny meoiryn shee ny yei lostey cutanyn ayns thie oast mooar ayns Doon Edin, as v'eh dy ve fakinit jannoo shen er CCTV! Lhaih mee ayns pabyr niaght Albanagh yn chione-lhinney share lhiam neayr's 'SuperCaleygoballisticCelticareatrocious!' (tra hug Inverness Caledonian Thistle Celtic magh ass Cappan ny h-Albey), as va shen 'Its Curtains for Wilson'.

Ansherbee, lhiams dy vel argid ry-gheddyn dooin my ta shin cur stiagh treealtys sy traa ry-heet. Honnick mee casslysyn çheerey jeh Nalbin, Nerin as Mannin, ec cuirrey-kiaull Iomairt Cholm Cille ayns Glaschu as myr va mee gra, ta anaase oc er Mannin. Ansherbee, my fer erbee goll gys Beeal Feeirshtey cur post-l dou my salliu as foddym cur niaght er shoh.

Manannan jannoo er National Geographic

2006-02-26T16:38:00.000Z

Hug yn ynnyd-thie National Geographic yindys orrym liorish yn art shoh: http://www7.nationalgeographic.com/ngm/0603/feature3/index.html crig er y kiangley 'Sights and Sounds' son spoyrt; ta'n ellen ain er gleashaghey reesht! Agh gyn shen t'eh anaashagh dy liooar. My ta foast ourys erriu mychione feeuid nyn gultoor ayns margey y teihill sheeu shilley y chur er'n art shoh.

Blog Noa

2006-02-24T22:48:00.000Z

Ta mee er jannoo blog noa son ynseydaghyn, as shen y fa nagh vel mee er jannoo claare noa Radio Seyr rish tammylt. Cha nel ny lhoobyn-sheeaney goll dy mie ec y traa t'ayn, agh lhiams dy bee ad ny share dy gerrid. Cha nel mee boirrit er marrenyn er y vlog shoh, agh cur fys dou my ta shiu fakin red erbee ageayagh er shen my salliu.

Jeeagh er http://lughtynsagh.blogspot.com/ my vees traa eu.

Coorse Trainal 'er Ynsee

2006-02-23T14:53:00.000Z

S'baghtal dy vel feme ain son fir-ynsee noa sy traa ry-heet. Ta mee jannoo coorse ec Olloo Scoill Strah Cleayee ec y traa t'ayn. She coorse mie lhiam, as ta mee gynsaghey Gaidhlig ny h-Albey ec y traa cheddin er yn oyr dy vel she coorse son fir-ynsee Ghaidhlig t'ayn. S'costal goll noon as noal as tannaghtyn ayns Glaschu. She aigh vie aym dy vel ny h-Albinee arryltagh cur cooney dou myr shoh, agh cre vees shin jannoo sy traa ry-heet? Nagh beagh eh ny share my veagh coorse ayns Mannin? Hie mee gys Colleish Vannin nurree, fys mychione y chooish y hirrey, as vrie y fer-toshee jeem 'cre'n fa t'ou laccal trainal myr fer-ynsee Ghaelg? Nagh bare lhiat ynsagh Baarle?' Gyn chyndaa smooinaghtyn myr shen nagh bee reddyn gaase ny share.

Oie Ghaelgagh Phurt ny h-Inshey

2006-02-23T14:26:00.000Z

Cheayll mee dy bee Oieghyn Ghaelgagh Phurt ny h-Inshey currit er bun dy gerrid. Lhiams dy bee ad fo shiaulley sy chied shiaghtin Mee Vayrnt sy Club Virling, agh my fys share lhiu post er shoh my sailliu.

2006-02-13T19:13:00.000Z

Va shirveish ny merriu Yamys y Cowle ayn jiu.
Va'n cheeill lum-lane dy dobberanee as s'baghtal dy row ram slieh cur ard-arrey er. S'cooie va'n shirveish hene, va ard-voylley y taggart feer vie, lhiah Adrain Pilgrim ard-volley bardoil cooie, lhiah Emma y Christian daan cooie liorish Illiam y Kennish, lhiah Markys y Kermitt saum 23 ass y vlass lane vie tradishoonagh echey, ghow shin 'How Great Thou Art' as 'The Manx Fisherman's Evening Hymn' as eisht ghow Emma yn arrane 'Ellan Vannin' chouds dymmyrk ad y coavin magh as eh coamrit sy Tree Cassyn Vannin. S'tostagh va shen, as smoo tostagh tra ghow ee 'Arrane Oie Vie' as 'Arrane Colum Killey' lurg y cheilley ec jerrey yn shirveish.

Va'n oanluckey ayns ruillick Skyll Maghal.

Dooyrt fer ny daa ny dobbranee dou dy vel ad goaill trimshey nagh vel monney recortyssyn jeh ayn. S'feer shen, agh cheayll mee kuse ennagh y vlass v'ec Freddy hene sy corraaghyn ayns Raad Cardle Vooar jiu.

Aboo!

2006-02-12T19:32:00.000Z

12/2 Ta David Knight er cosney yn ratçh Hell's Gate syn Iddaal reesht. Ta'n varriaght shoh jannoo tree ass tree echey son y ratçh shoh.

Shoh art beg screeu mee my e chione ec kione nurree.
------------------------------------------------------------------
She dooinney s’tappee sy theihll er roar-bree enduro dooinney cummal ayns Mannin, as she Manninagh eshyn, shiaght bleanney as feed dy eash, ruggit ayns Mannin as troggit ayns Sulby. Cha nel eh cosney beggan er veggan noadyr, ta'n aghtallys as y tappeeys ec jannoo eh neuchleighagh. Vel oo er clashtyn yn ennym er? Shen eh, she David Knight eshyn.

Cheumooie Ny h-Ellanyn Goaldagh t'eh cho ardghooagh as Valentino Rossi. My t'ou jeeaghyn er pabyryn niaght roar-bree sy Shapaan, sy Rank, ny ayns Ny Steatyn Unnaneysit veagh oo feddyn artyn as fotografyn dy liooar jeh, as s'mennick dy liooar ta Ny Tree Cassyn Vannin ry-akin echey.

Sy vlein shoh (2005) ren eh cosney shey jeig ass hoght ratchyn jeig Feniaghtys y Theihll Enduro. Chossyn eh Yn Feniaghtys Goaldagh neesht. Ayns Mean Fouyir hie eh gys Slovakia as haink eh dy ve y chied doinney ass Ny h-Ellanyn Goaldagh cosney yn Enduro Shey Laaghyn Eddyr Ashoonyn (ny ISDE ass y Vaarle). She yn ratçheyder ny share sy theill jeh feer-ratçhyn-reeastagh neesht. Chossyn eh y ratçh 'Giat Niurin' ayns Yn Iddaal as ayns America chossyn eh y ratçh 'Fer S'Jerree Ny Hassoo' ayns Teksas as Endurocross-Çheu-sthie Maxxis ayns Las Vegas.

S'tappee eshyn er ny raadyn as raneyn neesht, ayns 2004 chossyn eh 'Ultimate Biker', ratçhyn ayns Sostyn eddyr ratçheyderyn ny share voish gagh sorçh ratçh roar-bree harrish dagh sorçh rane.

Ga dy row eh er chosney bunnys dy chooilley ny ratchyn hie eh stiagh nurree v'eh blein trimshagh echey myrgeddin. Trooid bleayntyn as bleayntyn va'n ayr ec, Paul, cur cooney mie da, as da Juan e vraar (dooinney niartal sy theihll Trials), agh hooar eh baase roish chossyn David Feniaghtys y Theihll. Dooyrt eh lurg chossyn eh 'hug mee gialdin da'n shenn dooinney dy veagh me cosney yn ard-ennym, myr shen, ren mee shoh er-e-hon."
------------------------------------------------------------------

She dooinney mie David as ga dy vel eh ny ard-rollage cha vel eh ny vooaralagh er chorr erbee. S'mian lhiam y vlein shoh cho speeideilagh lesh as nurree.

Niaght Trimshagh

2006-02-09T20:51:00.000Z

Jamys MacCowle.

Cha nee mish yn dooinney share shoh y screeu mychione as ta'n niaght cho neuvaynrey as shoh. Cha daink mee e whail dy mennick, agh she cooinaghtyn mie as lajer aym er yn aght niartal v'eh goaill cowag marish Markys y Kermitt as fir elley ec yn chied oie-Gaelgagh hie mee gys ayns Rhumsaa. S'ynsit v'eh as ny 'er-ynsee feer vie. S'trimshagh ta ny Gaelgeyryn. S'treisht lhiam dy veagh tooilley fys r-gheddyn my-e-chione as mychione e vea ec y voaryd LISTSERV : https://listserv.heanet.ie/cgi-bin/wa?A0=gaelg&O=D&T=0 .

Shee Yee Er