Foast Bio

Hello my chaarjyn, she traa foddey er ve ayn neayr's screeu mee er y vlog shoh. Ta mee er ve tarroogh ass towse, agh nish ta mee smooinaghtyn mychione shallee noa bentyn da'n vlog shoh. Ta mee son screeu skeeal. Bee yn chied ayrn ry gheddyn er y gherrid.

blog noa

Traa foddey gyn screeu. Ta mee er ve feer tarroogh, agh cha nee leshtal mie shen. Ta mee jus' er n'akin blog elley sy Ghaelg, as va shen dy my ghreinnaghey post noa y screeu. She blog Claare ny Gael liorish Bob Carswell ta mee çheet er, t'eh kianglit rish yn chlaare radio echey as t'eh ry-gheddyn ec <http://www.manxradio.com/blog.aspx?blogid=14912>. 

Loayrt dy firrinagh, cha nel monney niaght aym pene. Ta mee er ve gobbraghey dy jean cur Gaelg er daa ur-skeeal screeuit hoshiaght ayns Gaelg ny h-Albey, as daa 'er elley screeuit ayns Yernish. T'ad jeeaghyn feer vie, agh ta'n obbyr goll dy moal. Ta mee cliaghtey cur shilley er Brian as meeiteil marish Gaelgeyryn elley son coyrle y ' eddyn, agh shegin dou goaill rish nagh beagh ad jeant er y gherrid. Ta feme ain er lioaryn teks y screeu son ny h-ardscoillyn, as ga dy vel yn obbyr shen cur dreeys orrym shegin dou shen y yannoo hoshiaght. 

Ta my ven as my 'neen shinney goll dys y Çhapaan ec jerrey yn çhiaghtin shoh as, er y fa dy bee eh orrym freayll rick er ny paitçhyn elley, cha bee caa aym goll magh dys Y Chruinnaght - ta goaill toshiaght y chied laa jeig Jerrey Souree.Ta mee hene as my vac goll dys Y Çhapaan ayns Luanistyn, as ta mee kiarail screeu dy reiltagh mychione y turrys shen er shoh. 

Gamman mie

She shoh yn laa hooar skimmee bluckan-choshey y Vunscoill Ghaelgagh y chied varriaght oc. Aboo yn Vunscoill! Chossyn Skimmee B y Vunscoill (son y chooid smoo blein 3 as 4, agh lesh cooney voish Magnus as Louis ass blein 2 as Pheonix as blein 5) gamman noi Bunscoill Willaston. Hooar Pheonix Gale y chied dean, as lurg da Willaston chosney daa ghean, vleayst Toshiki Teare y bluckan stiagh sy dean jus' roish lieh-hraa. Ec fea yn lieh-hraa loayr Captan Hewson rish y skimmee (sy Ghaelg). Sy nah lieh hooar Williston caa lurg caa, agh va Greg Halliday freayll dean y Vunscoill dy shickyr. Va'n scoar foast 2-2 as jus' tree minnid faagit. Hooar Adam Long y vluckan as dy cool as dy schlieoil, hug eh shaghey y cheeper eh. Ren Willaston baggyrt er dean y Vunscoill son cooid elley y ghamman, agh va'n linney-cooyl (Ambee, Phin, Magnus as Louis) cho shickyr as creg. Ta mee jeant feer wooiagh.

Oie Heiney syn Ablet

Ogh, s'doillee lhiam goll erash dys my obbyr y moghrey lurg yn oie roish - as myr shen v'eh moghrey y Jesarn shoh chaie. Oie Heiney hie mee-hene as Jamys y Phiobeyr-Faitagh dys y Jiass Dowin son jough, kiaull, spoyrt as y Ghaelg y gheddyn. Hooar mish palçhey dy yough, as hing mee bunnys derrey va'n thie-oast follym - ec traa va ny sleaie na va mee jerkal. Cha nel mooar yn cooinaghtyn aym er yn oie, agh s'cooin lhiam dy diu mee jough quaagh ny ghaa nagh row mee rieau goaill bine jeh roish - agh tra t'ou sy Raue ... 

S'treisht lhiam dy ren Jamys Aeg ny h-arraneyn couyral dy tappee, as nagh row yn ven aeg aalin va jeeaghyn mysh ro vollit. 

Bee oie Ghailckagh goll er cummal yn çhiaghtin shoh sy Lhong ayns Balley Chashtal. S'doghys lhiam dy bee caa aym goll. 

Vel enney eu er yn ennym Edward Dwelly? My ta shiu er chur eab er Gaelg ny h-Albey 'ynsaghey er lhiams dy vel shiu er n'akin yn fockleyr mirrilagh jeant echey. Va claare er y çhellveeish noght (er BBC Alba - ammyr 168) dinsh skeeal e vea - as t'eh braew feeu jeeaghyn er  - my ta sym ayd er Gaelg ny h-Albey, ny fockleyrys. Va Dwelly ruggit ayns Sostyn Jiass as tra v'eh aeg v'eh ny hidoor. V'eh currit dys Nalbin dy chooney lesh yn obbyr v'ec Towshan ny Gunnyn Mooarey (Ordnance Survey) aynshen. Haink sym er ny h-enmyn buill as fockleyn Gaelgagh er - as myr shen ghow toshiaght obbyr e heihll - screeu fockleyr smoo ny Gaelgey v'ayn rieau. Lurg bleintyn as bleintyn, as eh as yn lught-thie echey surranse gyn argid ny enney, hie yn lioar er cur magh - ga nagh row agh gennid dy leih kionnaghey ny lioaryn. Er lhiam nagh vel ooilley ny claareyn jeant ec BBC Alba yindyssagh, dy jarroo, ta ram claareyn nagh vel feeu jeeaghyn er edyr, agh va'n claare shoh feer vie lhiams, as foddee lhiush - she 'Leabhar an Aigh' yn ennym t'er as t'eh ry-gheddyn ec iplayer BBC Alba.

Blein Vie Noa

Gow shiu my leshtal nagh vel mee er screeu red erbee er shoh rish meeghyn. Cre'n fa? Wahll, ta mee er ve feer tarroogh - agh ta fys aym dy re leshtal boght shen! Myr shen, ta mee son jannoo my chooid share art ny ghaa y screeu aynshoh dagh mee veih shoh magh. Neayr's yn art jerrinagh ren mee screeu ta ram reddyn er daghyrt:

Yn Chooish.

Ayns Mee Houney hie Yn Chooish er chummal as hie mee-hene dys bunnys dy chooilley chuirrey-kiaullee as seshooon - as va'd ooilley feer vie. Haink shinyn quail lesh sleih aegey ass Nerin neesht - agh, s'treih lhiam gra nagh vel mee er loayrt roo ny cur çhaghteraght roo lurg daue goll dy valley - agh nee'm er y gherrid!

Yn Nollick

Va mee feer, feer tarroogh ec y traa Nollick - va mee gobbraghey ayns Rhumsaa myr buitçhoor. Ta mee er ve cooney sy çhapp dagh Jesarn neayr's y Tourey, tra haink çhingys trome er my naim, agh she Yn Nollick ta'n traa smoo tarroogh ec buitçhooryn, as myr shen, va mee gobbragh sy çhapp bunnys dagh ooilley oor ny laghyn seyrey aym er lhimmey jeh Laa ny Nollick, Laa'l Steoin as Laa ny Bleeaney Noa. Helg mee y drean as chloie mee cammag ayns Balley Keeill Eoin - agh loayrt dy firrinagh, va mee feer skee! 

Baase Cholin y Jerry

S'treih lhiam gra dy daink teaym chree er Colin Jerry er y nuyoo oie jeig jeh Mee ny Nollick as eh cloie kiaull sy thie oast, as dy dooar eh baase gerrid ny lurg. Va Colin ruggit ayns Sostyn sy vlein 1936. Va'n ayr echey ayns yn RAF car y nah chaggey mooar, as v'eh coyrt dys Jourby kindagh rish. Va graih ec ayr Cholin er yn ellan as haink eh dys shoh marish e chloan er ny laghyn seyrey oc ymmodee keayrtyn. Haink Colin hene dy ve cho graihagh er yn ellan neesht dy row eh kynjagh gra dy by vie leshyn çheet dys Mannin couyr cummal. Myr shen, lurg cheim eh myr ynseyder ayns Sostyn, haink eh dys Mannin dy 'eddyn obbyr. Hooar eh obbyr ayns Bunscoill Phurt ny h-Inshey sy vlein 1968. Haink eh dy ve ny Ghaelgeyr, as ren eh obbyr niartal son aavioghey kiaull y theay. Dy jarroo, she Colin yn dooinney screeu ny lioaryn Kiaull y Theay 1 as Kiaull y Theay 2 - lioaryn shegin da kiaulleyder erbee jannoo ymmyd jeh my t'eh son kiaull Vannin 'ynsaghey. Haink eh dy ve feer ynsit as schleioil er yn phiob uillin neesht - she tashtey my chooinaght eshyn cloie carryn Manninagh er y phiob. Un oie, mysh daa vlein dy lieh er dy henney, hie mee dys thie Cholin as Cristl ayns Purt ny h-Inshey er yn oyr dy row eie aym yn phiob 'ynsaghey. Va Colin jeant booiagh, er lhiams, as hug eh piobyn dou er eeasaght - as, roish my dimmee mee, dynsee eh dou yn aght bunnydagh ad y chloie. S'treih lhiam gra nagh dod mee geddyn agh screeagh agglagh assdaue - as cha ren mee cliaghtey monney derrey hug mee seose er baare y phrest ad as daag mee ad ayns shen. Ansherbee, mysh shey mee lurg dou feddyn ad er eeasaght, haink mee e whail, jus' roish y Nollick, sy Thie Bane. Va mee marish Phil Kelly as va shinyn er ve giu gollrish y jouyl son daa ny tree oor. Hoie Colin sheese marin as loayr eh sy Ghaelg. S'beg dod mee credjal cho mie as v'an Ghaelg echey as ny skeealyn va teaumey magh ass. Va Colin ny ghooinney er lheh. Shee Yee er as dy row jough laynt da eu.

Nalbin Noa

My leshtal nagh vel mee er screeu mychione y chooish shoh roish nish, agh by vie lhiam ginsh diu mychione turrys ren mee dys Nalbin Noa sy Chanadey ayns Luanistyn, mleeaney. She turrys liauyr v'ayn, voish Mannin gys Lunnin, voish Lunnin gys York Noa, voish York Noa gys Halifax, as fy yerrey, Halifax gys Antigonish. Ayns shen, ayns Olloo Scoill Xavier, va cho-choyrle goll er chummal ec Rannsachadh na Gàidhlig ('Ronsaghey ny Gaelgey' - possan ollooagh son Ghaelg ny h-Albey). Deisht mee rish ymmodee oraidyn as leaghtyn trooid as mychione Gaelg ny h-Albey, as haink mee quail lesh ram sleih as Gaelg ny h-Albey ny Gaelg ny h-Erin oc. Chammah's shen, hie mee dys Eilean Cheap Breatuinn (Ellen Chape Bretin) raad ta'n chooid smoo dy loayrtee dooghyssagh cummal. S'dooie dou va dy chooilley pheiagh v'ayn, as va sym mooar oc bentyn rish y Ghaelg. Va yindys mooar orrym pene dy row Gaelg cho niartal ayns Nalbin Noa as t'ee - eer ayns Halifax, yn ard-valley smoo. Heese ta kuse dy kianglyn diu ta cur sollys tooilley er y chooish.

http://www.halifaxgaelic.ca/tutorials.php
http://www.gaelic.ca/index.php
http://journalism.ukings.ca/files/rr_040208gaelic-jerrett.mp3